Խոշոր գործարար, Հ2 հեռուստաընկերության սեփականատեր Սամվել Մայրապետյանի վերաբերյալ քրեական գործի մասին ՀՔԾ պետ Սասուն Խաչատրյանը ձեռնպահ է մնում մանրամասներ հայտնելուց:
Այսօր՝ հոկտեմբերի 13-ին, Երեւանի քաղաքապետարանում լրագրողների հետ զրույցում ՀՔԾ պետ Սասուն Խաչատրյանը, վկայակոչելով Մայրապետյանի փաստաբաններին, նշեց, որ մեղադրանքը վերաբերում է կաշառք ստանալուն օժանդակելուն:
Հարցին, թե այդ գործն ինչ վաղեմության է, արդյոք այն որևէ կապ ունի՞ «Մարտի 1»-ի հետ, նաև կա այդտեղ Ռոբերտ Քոչարյանի առնչությունը, ՀԾՔ պետը պատասխանեց.
«Այդ գործով, որքանով դուք արդեն տեղյակ եք պաշտպանների հրապարակած տվյալներից, մեղադրանքը վերաբերում է կաշառք ստանալուն օժանդակելուն։ Դրանից ավել բան ես չեմ կարող ասել՝ գործի շահերից ելնելով: Պաշտպանն արդեն հրապարակել է, որ խոսքը 2008 թվականի մասին է»։
Հավելենք, որ Սամվել Մայրապետյանին մեղադրանք է առաջադրվել Քրեական օրենսգրքի 38-311–րդ հոդվածի հատկանիշներով՝ կաշառք ստանալուն օժանդակելու համար։
Հիշեցնենք, որ խոշոր գործարար Սամվել Մայրապետյանը ձերբակալվել է հոկտեմբերի 6–ին՝ ՀՔԾ-ում։ Մայրապետյանը չի ընդունում իրեն առաջադրված մեղադրանքը։
