ՀՀ վարչապետի պաշտոնակատար Նիկոլ Փաշինյանը «Իմ քայլը» դաշինքի քարոզարշավի շրջանակներում չնախատեսված այց է կատարել Թալին: Այս մասին տեղեկանում ենք Նիկոլ Փաշինյանի ֆեյսբուքյան ուղիղ հեռարձակման միջոցով:
Թալինցիները Նիկոլ Փաշինյանին և նրա տիկնոջն ընդունեցին շամպայնով և աղունիկներ երկինք բաց թողնելով:
Երբ Նիկոլ Փաշինյանը հավաքվածներին հարցրեց, թե ինչպես են, նրանք ասացին, որ իրենց լավ լինելը կախված է հենց նրանից, ինչին Փաշինյանն պատասխանեց. «Մենակ ինձնից չէ կախված, ձեզնից էլ է կախված»:
Հավաքվածները հորդորով դիմեցին Փաշինյանին.
«Գործարան բացեք, ջահելները պատերի տակ նստած են, արդարություն չկա: Չի լսում դատարանը, վերաքննիչը»:
Փաշինյանն արձագանքեց հետևյալ ձևով. «Դատարանների պրոբլեմը դեռ կա, ընդունում եմ»:
Իսկ վերջում դիմելով թալինցիներին՝ ասաց. «Ամենակարևորը դուխով եղեք, դուք եք տերը երկրի, ցանկացած ընտրություն պետք է հաղթեք»:
Հավելենք, որ հավաքված կանանցից մեկը դիմելով Աննա Հակոբյանին՝ ասաց, որ նա առաջին տիկինն է, ով քարոզարշվի շրջնականերում եկել է իրենց մոտ:
Հիշեցնենք, որ «Իմ քայլը» դաշինքը ներկայացրել է իր նախընտրական ծրագիրը եւ դրամահավաք է անցկացրել։ Միջոցառմանը ներկա էին ՀՀ վարչապետի պաշտոնակատար, «Իմ քայլը» դաշինքի ցուցակը գլխավորող Նիկոլ Փաշինյանը եւ պատգամավորության թեկնածուները։
Փաշինյանը նաեւ տեղեկացրել է, որ վաղվանից արձակուրդի է մեկնում, որպեսզի անձամբ մասնակցի քարոզարշավին։
Հավելենք, որ ԱԺ արտահերթ ընտրությունները կկայանան դեկտեմբերի 9-ին, ընտրություններին մասնակցում է 11 կուսակցություն եւ կուսակցությունների դաշինք։
Կարդացեք նաև՝ Հոռետեսությունը փոխարինելու ենք լավատեսությամբ...Նիկոլ Փաշինյանի ելույթն՝ «Իմ քայլը» դաշինքի դրամահավաքին
Ինչ տեսել եք, էլ չեք տեսնելու. Նիկոլ Փաշինյանը Ուջանում զրուցել է գյուղացիների հետ
