Որքանով ես տեղյակ եմ՝ մարզպետները գործել են օրենքով սահմանված կարգով, չեն չարաշահել իրենց լիազորությունները: Այս մասին ԱԺ ճեպազրույցների ժամին հայտարարեց «Իմ քայլը» խմբակցության ղեկավար Լիլիթ Մակունցը` անդրադառնալով մարզպետների` իրենք իրենց պարգեւատրմանը: Մակունցը նշեց, որ այդ պարգեւատրումները տեղի չեն ունեցել միայն մարզպետարանների շրջանակներում, նման պարգեւատրումներ միշտ լինում են տարբեր կառույցներում:
«Ստացվում է՝ մի կառույցի պայմաններում դա ընդունելի է, մյուսի դեպքում` ոչ»,- ասաց նա: Դիտարկումներին՝ նրանց պաշտոնավարման մեկ տարին դեռ չի լրացել, Մակունցն ասաց. «Անկեղծ ասած, չգիտեմ` օրենքով ոնց է կարգավորվում այս հարցը, բայց խնդիրը ցածր աշխատավարձերն են եւ լավագույն աշխատողները խրախուսման եւ պարգեւատրումների կարիք ունեն: Այլ հարց է` ես ինչ կարծիք ունեմ: Մենք խմբակցությունում չենք քննարկել այս հարցը»,- ասաց նա:
Նա հավելեց, որ եթե օրենքը թույլատրում է՝ նորմալ է, այլ հարց է, եթե մենք ուզում ենք սահմանափակել, որ կառույցները իրենք իրենց չպարգեւատրեն: «Սա կքննարկենք»,- ասաց նա:
Հիշեցնենք, որ հայտնի է դարձել, որ Արարատի մարզպետ Գարիկ Սարգսյանն ինքն իրեն պարգևատրել է աշխատավարձի 104,5%-ի չափով, Սյունիքի մարզպետ Հունան Պողոսյանն իրեն պարգևավճարով խրախուսել է երկու անգամ, այլ մարզպետներ ևս իրենք իրենց պարգևատրել են:
