Սնուփ Դոգի համերգի կայացման վերաբերյալ բանակցությունները շարունակվո՞ւմ են, թե՞ ոչ, դիմելով ԿԳՄՍ նախարար Ժաննա Անդրեասյանին՝ հարցրին լրագրողները:

«Սնուփ Դոգի համերգը կազմակերպող ընկերությունն ամբողջ տարին բանակցել է, որպեսզի համերգը տեղի ունենա: Տարբեր ժամանակաշրջաններում ունեցել են որոշակի նախնական պայմանավորվածություններ, որոնք ինչ-ինչ պատճառներով չեն իրականացվել»,- հայտնեց Ժաննա Անդրեասյանը՝ հավելելով, որ այս պարագայում պետք է գործեն պայմանագրի դրույթները: «Քանի որ նախատեսված ժամանակահատվածում համերգը չի կայացել, ապա մենք արդեն իսկ գրությամբ դիմել ենք կազմակերպությանը, որպեսզի ամբողջ գումարը վերադարձվի պետբյուջե, ինչպես և նախատեսված էր»,- ասաց նախարարը:

***

«Ուսուցիչների ատեստավորումը 2024-ին կազմակերպվեց ուշ՝ նոյեմբերի ընթացքում, կապված էլեկրոնային եղանակով նոր համակարգի հետ»,- այսօրվա ասուլիսի ժամանակ ասաց ԿԳՄՍ նախարար Ժաննա Անդրեասյանը՝ անդրադառնալով ուսուցիչների ատեստավորմանը և տրամադրվող հավելավճարներին: «Վերջին ատեստավորումները նոյեմբերի 22-ին և 24-ին են անցկացվել: Դրանից հետո ընթացել է բողոքարկման գործընթաց և եղել է հրաման, որով վերջնական ֆիքսվել են ուսուցիչների արդյունքները. դա եղել է դեկտեմբերի վերջին, հետևաբար հավելավճարը հաշվարկվում է որոշման օրվանից հետո»,- նշեց նախարարը և ընդգծեց, որ հունվարից սկսած հավելավճարները տրամադրվելու են ուսուցիչներին, իսկ ժամկետն էլ հաշվարկվելու է որոշումը կայացնելու օրվանից: Նախարարի խոսքով՝ ատեստավորման համար դիմած ուսուցիչների 80 տոկոսը մասնակցել է՝ շուրջ 5000 մասնակից. «Ավելի քան 70 տոկոսը հաջողությամբ է հաղթահարել ատեստտավորումը, որի արդյունքում ունենալու է կա՛մ դրույքաչափի փոփոխություն, կա՛մ փոփոխություն և հավելավճար»: