Երևանի ավագանու անդամ Իզաբելլա Աբգարյանի գրառումը.
«Օպտիմալացման ևս մեկ նախագիծ, որի մասին ուզում եմ տեղյակ լինեն «Լևոն Հովհաննիսյանի անվան Սրտաբանության գիտահետազոտական ինստիտուտի» բուժանձնակազմը և բոլոր շահառուները:
Այսօր Երևանի ավագանու մշակույթի, կրթության, առողջապահության հանձնաժողովը, ընդլայնված նիստ անելով ֆինանսական հանձնաժողովի հետ, 6 կողմ, 2 ձեռնպահ քվեարկությամբ դրական եզրակացություն տվեց Սրտաբանության ինստիտուտը «Քանաքեռ֊Զեյթուն» բժշկական կենտրոնին միացնելու նախագծին:
Ավագանու վերջնական որոշմանը նախագիծը քվեարկության կդրվի երեքշաբթի կայանալիք նիստին:
Կրկին ավագանու ուսումնասիրությանն է ներկայացվել ոչ թե 14 օր առաջ, այլ բերվել է հրատապ կարգով:
Արդյունքում Սրտաբանականի շենքը կազատվի, բուժաշխատողները կտեղափոխվեն Քանաքեռ֊Զեյթուն ԲԿ: Բնականաբար, կիրականացվի նաև կադրային օպտիմալացում:
Ըստ քաղաքապետի տեղակալի, միավորված բժշկական կենտրոնը կղեկավարի Սրտաբանականի տնօրենը:
Իմ հարցին, թե արդյո՞ք բուժանձնակազմի հետ քննարկում տեղի ունեցել է, տրվեց բացասական պատասխան: Եղել է քննարկում տնօրինության հետ:
Հաշվի առնելով, որ տնօրենի շահից է բխում է միավորված բուժհաստատություն ղեկավարելը, ուզում եմ լսել բուժանձնակազմի մոտեցումները՝ միևնույն ժամանակ տեղյակ պահելով նախագծի մասին:
Շնորհակալ կլինեմ տեղեկատվությունը տարածելու համար:
Հ.գ. Քննարկումից պարզ դարձավ, որ մտադրություն կա հետագայում միացնել նաև Զեյթունի ծննդատունը»:
