168․am-ն անդրադարձել է «Էրեբունի-Երևան-2806» տոնակատարության շրջանակներում Երևանի քաղաքապետարանի ճոխ գնումներից մի քանիսին։
Այսպիսով, պետգնումների armeps էլեկտրոնային համակարգում շարունակում են հանրայնացվել «Էրեբունի-Երևան-2806» տոնակատարության շրջանակներում մշակութային միջոցառումների կազմակերպման, ծառայությունների մատուցման պայմանագրերը, որոնցից տեղեկանում ենք՝ Երևանի քաղաքապետարանը միջոցառման տեխնիկական ապահովման համար «Սթեյջ Դիզայն» ՍՊԸ-ի հետ կնքել է 45 միլիոն դրամ արժողությամբ պայմանագիր՝ ոչ մրցակցային գնման մեկ անձ ընթացակարգով։
ՍՊԸ-ն այս գումարով ստանձնել է Ազատության հրապարակում և Կասկադ համալիրի տարածքում համերգային միջոցառումների տեխնիկական վարձակալության ու սպասարկման ծառայությունները։
Ըստ իրավաբանական անձանց տվյալների՝ 2014 թվականից գրանցված «Սթեյջ Դիզայն» ընկերությունը պատկանում է Հովհանենս Մելոյանին և Գրիգորի Վարդանյանին, իսկ ըստ պետգնումների կայքի տվյալների՝ այս ընկերության հետ տարբեր գերատեսչություններ՝ Երևանի քաղաքապետարան, Հանրային հեռուստաընկերություն, Քննչական կոմիտե, գնումների մեծ մասը կազմակերպել են հրատապ մեկ անձ ու մեկ անձ ոչ մրցակցային ընթացակարգերով։
«Էրեբունի-Երևան-2806» տոնակատարության շրջանակներում Երևանի քաղաքապետարանը հաջորդ խոշոր գնումը կատարել է «Սթեյջ սթայլ» ընկերությունից։ Դարձյալ մեկ անձ ընթացակարգով կնքված պայմանագրի գինը 41 միլիոն 106 426 դրամ է։
Այս գումարով, ըստ պայմանագրի տեխնիկական բնութագրի, ընկերությունը ապահովել է դեկորատիվ սեգմենտների պատրաստման մոնտաժման, ապամոնտաժման ու բեմի քողարկման ծառայություններ Ազատության հրապարակում, Հանրապետության Հրապարակում, Դիանա Աբգարի անվան զբոսայգում և Կասկադ համալիրում։
2013 թվականին հիմնադրված «Սթեյջ Սթայլ» ընկերությունը պետգնումներում իր ակտիվությունը սկսել է 2019 թվականից՝ հիմնականում գնման ոչ մրցակցային՝ մեկ անձ, հրատապ մեկ անձ ընթացակարգերով՝ միլիոնավոր դրամների տասնյակ պայմանագրեր կնքելով պետական տարբեր գերատեսչությունների հետ։
Միայն այս տարեսկզբից ընկերության հետ կնքվել է արդեն 7 պայմանագիր, որոնցից 6-ը՝ Հանրային հեռուստաընկերության հետ։
Տոնական հաջորդ գնումը քաղաքապետարանն արել է Հայաստանի Էստրադային ջազ նվագախումբ ՊՈԱԿ-ից՝ մեկ անձից գնման եղանակով կքնված 4 միլիոն դրամ արժողությամբ ձեռք բերելով ծառայություններ, այն է՝ 30 րոպեանոց ելույթ Կասկադում։
«Լայթ ափ քոմփանի» ՍՊԸ-ն կնքված 1 միլիոն 579.000 դրամ արժողությամբ պայմանագրով ապահովել է Էրիկ Կարապետյանի՝ առնվազն 2 րոպեանոց ելույթը Հանրապետության Հրապարակում կայացած գալահամերգի ընթացքում, իսկ «Պապոնյա» ՍՊԸ-ն 4 միլիոն 145.900 դրամով՝ Գարիկ և Սոնա նվագախմբի՝ Շարլ Ազնավուրի Հրապարակում՝ առնվազն 30 րոպեանոց և Հանրապետության Հրապարակում՝ առնվազն 2 րոպեանոց ելույթները։
Պայմանագրերից տեղեկանում ենք՝ գները ներառում են կատարողի կողմից իրականացվող ծախսերը՝ ներառյալ հարկերը, տուրքերը և ՀՀ օրենսդրությամբ սահմանված այլ վճարները։
Ավելի վաղ կայքը անդրադարձել էր «Էրեբունի-Երևան-2806» տոնակատարության շրջանակներում մշակութային միջոցառումների կազմակերպման, ծառայությունների մատուցման մի քանի պայմանագրերի․
1 միլիոն 378.100 դրամով Գևորգ Հակոբյանը Ազատության հրապարակում համերգի ընթացքում առնվազն 10 րոպեանոց ելույթ է ունեցել,
Վահե Խանամիրյանը 700.000 դրամ արժողությամբ պայմանագրով ստանձնել է միջոցառման շրջանակում Շառլ Ազնավուրի հրապարակում կայացած էստրադային համերգի հաղորդավարի ծառայությունների կատարումը,
Աննա Ավանեսյանը 1 միլիոն դրամ է ստացել Ազատության հրապարակում դասական համերգի ժամանակ՝ 17։00-20։30 հաղորդավարի ծառայության համար,
«Թի Էմ պրոդակշն» ՍՊԸ-ն 1 միլիոն 305.600 դրամով ապահովել է Տիգրան Ժամկոչյանի՝ առնվազն 2 րոպեանոց ելույթը Հանրապետության հրապարակում կայացած գալահամերգի ժամանակ,
կոմպոզիտորներ, դիրիժոր Երվանդ Երզնկյանը 2 միլիոն 500.000 դրամով Ազնավուրի հրապարակում շուրջ 80 րոպե տևողությամբ համերգ է իրականացրել,
«Նումա» ՍՊԸ-ն՝ 10 միլիոն 530.000 դրամով ապահովել է Հյուսիսային պողոտայում 50 մասնակցով գինու փառատոնի ու Դիանա Աբգարի անվան զբոսայգում 24 մասնակցով գարեջրի փառատոնի կազմակերպումը,
«Ռեինկարնացիա»-ն Հանրապետության հրապարակում նախատեսված գալահամերգի ժամանակ առնվազն 2 րոպեանոց ելույթի համար կնքել է 2 միլիոն 400.000 դրամ արժողությամբ պայմանագիր,
Նունե Եսայանի հետ կնքված պայմանագրի գինը կազմել է 1 միլիոն 268.800 դրամ,
Դիանա Աբգարի զբոսայգում Ջագ և Նարեկ Բարսեղյանի առնվազն 40 րոպեանոց ելույթի համար կնքված պայմանագրի գին է նշվել 1 միլիոն 111.200 դրամը։
***
Ավելի վաղ, 168.am-ը գրել էր․ «Պետգնումների էլեկտրոնային armeps համակարգում արդեն հանրայնացվել են «Էրեբունի-Երևան-2806» տոնակատարության շրջանակներում մշակութային միջոցառումների կազմակերպման, ծառայությունների մատուցման մի քանի պայմանագրեր։ Դրանցից տեղեկանում ենք, թե ո՞վ ու ի՞նչ ծառայության համար՝ ինչքա՞ն է ստացել քաղաքային բյուջեից․Ներկայացնում են առավել խոշոր գնումները։
Ըստ այդմ՝ Երևանի քաղաքապետարանի և Ֆ/Ա «Գևորգ Հակոբյան»-ի միջև կնքված պայմանագրով, որի գինը 1 միլիոն 378.100 դրամ է, կողմը պարտավորվել է հոկտեմբերի 13-ին Ազատության հրապարակում համերգի ընթացքում առնվազն 10 րոպեանոց ելույթ ունենալ։
Վահե Խանամիրյանն էլ 700.000 դրամ արժողությամբ պայմանագրով ստանձնել է միջոցառման շրջանակում Շառլ Ազնավուրի հրապարակում կայացած էստրադային համերգի հաղորդավարի ծառայությունների կատարումը ժամը 13։00-18։00-ի ժամանակահատվածում։ Մեկ այլ հաղորդավար՝ Աննա Ավանեսյանը, 1 միլիոն դրամ է ստացել Ազատության հրապարակում դասական համերգի ժամանակ՝ 17։00-20։30 հաղորդավարի ծառայության համար։
«Թի Էմ պրոդակշն» ՍՊԸ-ն 1 միլիոն 305.600 դրամով ապահովել է Տիգրան Ժամկոչյանի՝ առնվազն 2 րոպեանոց ելույթը Հանրապետության հրապարակում կայացած գալահամերգի ժամանակ։
Իսկ կոմպոզիտորներ, դիրիժոր Երվանդ Երզնկյանը «Էրեբունի-Երևան 2806» տոնակատարության շրջանակներում իր նվագախմբի հետ միասին քաղաքապետարանից ստացել է 2 միլիոն 500.000 դրամ՝ Ազնավուրի հրապարակում շուրջ 80 րոպե տևողությամբ համերգի համար։
«Էրեբունի-Երևան-2806» տոնակատարության շրջանակներում մշակութային միջոցառումների կազմակերպման ծառայություններ է մատուցել «Նումա» ՍՊԸ-ն՝ 10 միլիոն 530.000 դրամով ապահովելով Հյուսիսային պողոտայում 50 մասնակցով գինու փառատոնի ու Դիանա Աբգարի անվան զբոսայգում 24 մասնակցով գարեջրի փառատոնի կազմակերպումը։
Մեկ այլ ՍՊԸ՝ բոլորին հայտնի «Ռեինկարնացիա»-ն, Հանրապետության հրապարակում նախատեսված գալահամերգի ժամանակ առնվազն 2 րոպեանոց ելույթի համար կնքել է 2 միլիոն 400.000 դրամ արժողությամբ պայմանագիր։ Նույն համերգի ընթացքում Նունե Եսայանի առնվազն 2 րոպեանոց ելույթի համար էլ քաղաքապետարանի կողմից համանուն ԱՁ-ի հետ կնքված պայմանագրի գինն էլ կազմել է 1 միլիոն 268.800 դրամ։
Դիանա Աբգարի զբոսայգում Ջագ և Նարեկ Բարսեղյանի առնվազն 40 րոպեանոց ելույթի համար կնքված պայմանագրի գին է նշվել 1 միլիոն 111.200 դրամը։
Պայմանագրերից տեղեկանում ենք՝ գները ներառում են կատարողի կողմից իրականացվող ծախսերը՝ ներառյալ հարկերը, տուրքերը և ՀՀ օրենսդրությամբ սահմանված այլ վճարները։
Ահա այսպիսի տոն, բյուջե ու ճոխ-ճոխ գնումներ, որոնց միայն մի մասին անդրադարձանք այս հրապարակմամբ»։
