«Մայր Հայաստան» դաշինքի անդամ Սոնա Աղեկյանի ֆեյսբուքյան գրառումը․ «Երևան քաղաքի 2025թվականի արդեն հաստատված բյուջեով նախատեսվում է, որ ավտոտրանսպորտային միջոցների ավտոկայանատեղիում կայանման համար գանձվելիք վճարների տեսքով եկամուտները կազմելու են 2.1 մլրդ դրամ՝ 2024-ի բյուջեի ցուցանիշից 57.4%-ով կամ 0.8 մլրդ դրամով ավելի։
Այս առիթով, թերևս տեղին է, հիշելը, որ Երևանի ՔՊԿ-ական իշխանության այս «ձեռքբերումը» իրականություն դարձավ 2024թ. հունվարի 1-ից ավտոկայանման վճարի դրույքաչափերի կտրուկ բարձրացմամբ։ Քաղաքային իշխանություններն ամեն կերպ հերքում էին ավտոկայանման դրույքաչափերը ֆիսկալ նպատակով բարձրացնելու մեր մեղադրանքը և պնդում էին, որ այդ փոփոխությունը նպատակ ունի նվազեցնել ավտոմեքենաների հոսքը և բեռնաթափել քաղաքի կենտրոնը մասնավորապես, և մայրաքաղաքն ամբողջությամբ։
2024-ի ընթացքում մեկ անգամ չէ, որ «Մայր Հայաստանի» անդամներով արձանագրել ենք, որ փաստացի ո՛չ ավտոմեքենաների հոսքն է նվազել, ո՛չ էլ քաղաքն է բեռնաթափվել, բայց փաստում ենք, որ ՔՊԿ+Հանրապետություն+Հանրային ձայն-ի համատեղ թանկացման հետևանքով միակ շոշափելի արդյունքը մայրաքաղաքի բյուջեի լրացուցիչ եկամուտների հավաքագրումն է։
Արձանագրենք նաև, որ 2024-ի հունվարի 1-ից օգոստոսի 31-ը ներառյալ ավտոկայանատեղիում կայանման համար գանձվելիք վճարների տեսքով եկամուտների հավաքագրումը գերակատարվել է և 36.0%-ով կամ 490 մլն դրամով գերազանցում է նույնիսկ ամբողջ տարվա համար պլանավորված ցուցանիշին։
Ի վերջո, խնդիրը ոչ թե մայրաքաղաքի բեռնաթափումն է, այլ նիկոլի ասած թիվ 1 հերոսին՝ հարկատուին տուգանքի ու թալանի մատերիալ դարձնելը, որն ի դեպ, հիանալի իրականացնում են Երևանի քաղաքային իշխանությունները։ Ինչն ապացուցեցին կրկին անգամ նույն որոշումը հաստատելով Ավագանու վերջին նիստում` նույն այն որոշումը, որ ՀՀ վարչական դատարանը ճանաչել էր ոչ իրավաչափ։
Հիշենք, որ «Մայր Հայաստան»-ը 2024-ի փետրվարից վիճարկում էր Կարմիր գծերի կայանման վարձավճարի փխթանկացման ավագանու որոշումը»։