Կրակեի՞ն, սպանեի՞ն, այսպես արձագանքեց Նիկոլ Փաշինյանը Տավուշ մտած ադրբեջանցի հովիվի մասին հարցին։

«Մարդը քայլելով գալիս է, ձերբակալել են, հանձնել են ԱԱԾ-ին»,- լրագրողների հետ զրույցում հայտարարեց նա։

Փաշինյանն ասաց, թե աշխարհում չկա այդպիսի մի սահման, որ մարդը չկարողանա անցնել։

Փաշինյանը հայտարարեց, որ հովիվին կվերադարձնեն Ադրբեջան։

Հիշեցնենք՝ 2026թ. հոկտեմբերի 19-ին՝ 17:50-ի սահմաններում, Հայաստանի Հանրապետության տարածքում (Տավուշի մարզ) հայտնաբերվել է Թովուզի շրջանի Չատախ գյուղի բնակիչ, 1968թ. ծնված Ադրբեջանի Հանրապետության քաղաքացի Քասիմով Յաշար Ալի Օղլուն: 

Իրականացված ստուգողական միջոցառումների արդյունքում պարզվել է, որ ԱՀ քաղաքացին ՀՀ տարածքում հայտնվել է մոլորվելու արդյունքում:

***

Հայաստանի տնտեսությունում ապոկալիպսիս չի լինելու, ովքեր խոսում են ապոկալիպսիսի մասին, տնտեսությունից չեն հասկանում, խոսելով գազի գնի հնարավոր թանկացման և դրա հետևանքների մասին՝ ասաց վարչապետ Նիկոլ Փաշինյանը։

«2018 թվին էին ապոկալիպսիս խոստանում, 2019 թվին, 20, 21, 22, 23, 24, 25, 26-ին։ Այդ ընթացքում ի՞նչ է տեղի ունեցել Հայաստանի տնտեսության հետ, Հայաստանի տնտեսությունն աճել է և Հայաստանի տնտեսությունը շարունակելու է աճել։ Եվ ընդհակառակը, պետք է հարց տանք, էդ ո՞նց ա՝ կողքի Թուրքիայում գազը 3-4 անգամ ավելի թանկ ա, իսկ ընդեղ աճեցրած լոլիկը Հայաստանում աճեցրած լոլիկից՝ էժան»,-ասաց Փաշինյանը։ 

Նա նշեց, թե Հայաստանի տնտեսությունը պետք է զարգանա և լինի մրցունակ։

***

Ես քաղաքական որոշումներ չեմ կայացնում՝ ով զբաղվի տնտեսական գործունեությամբ, ով չզբաղվի, ասաց Նիկոլ Փաշինյանը։

Նա նշեց, որ 8 տարվա մեջ որևէ այդպիսի որոշում չի կայացրել. «Ինչպես նաև չեմ կայացրել որոշում, թե ով լրատվական գործունեությամբ զբաղվի, ով չզբաղվի»։

Հիշեցրեց, որ դեռևս 2018-ին հայտարարել է՝ բոլորը ունեն շանս հեղափոխությունից օգտվելու. «Այդ շանսից օգտվել են այդ թվում՝ նախկին հանրապետականներ, այդ թվում՝ նախկին դաշնակցականներ, և այդպես շարունակ։

Եթե պարզի, որ իրենք այդ շանսից օգտվել են, բայց մնացել են հանրապետական, իրենց հետ տեղի է ունենալու այն, ինչ հիմա և նախկինում տեղի է ունենում մյուսների հետ»։

***