Լեռնային Ղարաբաղ հայերի վերադարձի հարցը կարևոր է Ռուսաստանի համար, ինչի վկայությունն է ռուս խաղաղապահների ներկայությունը տարածաշրջանում, «24Նյուզ»-ին տված հարցազրույցում ասել է Հայաստանում ՌԴ դեսպան Սերգեյ Կոպիրկինը։
«Մենք միշտ համարել ենք, և այդ մասին հրապարակավ ասվել է, որ կարևոր է, որ հայերն ապրեն իրենց պատմական հայրենիքում՝ Ղարաբաղում։ Դրանով է պայմանավորված այնտեղ ռուս խաղաղապահների ներկայությունը։ Ղարաբաղցի այն հայերը, ովքեր ցանկանում են վերադառնալ, դրա իրավունքն ունեն։ Ես այնպես եմ հասկանում, որ ադրբեջանական կողմից այդ իրավունքը չի մերժվում»,- ասել է նա։

***

Մոսկվան՝ Հայաստանին զենք մատակարարելու մասին
Ռուսաստանը շատ լուրջ է վերաբերվում Հայաստանին արդեն իսկ ձեռք բերված զենք մատակարարելու` իր պարտավորություններին, և կողմերն ակտիվորեն փոխգործակցում են այդ ուղղությամբ։ Այս մասին «24Նյուզ»-ին տված հարցազրույցում ասել է Հայաստանում Ռուսաստանի դեսպան Սերգեյ Կոպիրկինը։

«Ես գիտեմ, որ ռուսական կողմը շատ լրջորեն է վերաբերվում այդ պարտավորությունների կատարմանը, այո, եղել են որոշակի օբյեկտիվ դժվարություններ, սա քաղաքականացված հարց չէ, հիմա կան ակտիվ շփումներ, փոխազդեցություններ, բոլոր պայմանագրերը, որոնք կան, պետք է կատարվեն առաջիկա երկու տարիների ընթացքում»,- նշել է նա։

Ավելի վաղ Հայաստանի Անվտանգության խորհրդի քարտուղար Արմեն Գրիգորյանը հայտնել էր, որ 2020-2024 թվականներին Ռուսաստանի մասնաբաժինը Հայաստանին զենք մատակարարելու պայմանագրերում 96%-ից նվազել է մինչև 10%-ի։