Այսօր՝ մարտի 13-ին, լրագրողների հետ զրույցում ՏՄՊՊՀ նախագահ Գեղամ Գևորգյանը, տեղեկացրել է, որ այս պահին Հայաստանում ախտահանիչների դիֆիցիտ չկա.
«Մենք ամեն օր դիտարկումներ ենք անում՝ անկախ այս դեպքից։ Ալկոգելի մասով երեկ հանդիպում եմ ունեցել ներքին արտադրողների հետ, օրական 6-7 տոննա ալկոգել է արտադրվում Հայաստանում։ Մենք խոսելու ենք նաև դեղատների հետ, իրենք ստանում են ու արագ վերջանում է։ Չեմ կարող ասել՝ սպառումը ամբողջ Հայաստանում ինչքան է, բայց բնակչության թվով դա բավականացնում է։ Կա նաև պահեստավորված որոշակի խմբաքանակ, եթե ուսումնական հաստատություններում պետք լինի պահեստավորված խմբաքանակ ունենք, որ կտրամադրենք»,- նշել է ՏՄՊՊՀ նախագահ Գեղամ Գևորգյանը։
Իսկ ինչ վերաբերում է դիմակներին, Գևորգյանն ասել է.
«Մեզ տնտեսվարողները հայտնում են, որ գների նվազեցման միտում կա, որովհետև Չինաստանն էլ է վաճառքի առաջարկ արել, սակայն գինը մի փոքր բարձր է։ Հիմա շուկայում, մեծածախի մասին է խոսքը, գները 150-ից 200 դրամ են։ Նաև փոքր լոկալ արտադրություն են սկսել անել տնտեսվարողները, գինը մոտ 200 դրամ է։ Եթե գնման անհրաժեշտություն լինի, ապա մենք Առողջապահության նախարարության հետ կապի մեջ ենք, տնտեսվարողները ևս կարող են պահանջարկը ապահովել»։
Դիտեք նաև՝
