Առողջապահության նախարարի պաշտոնակատարը կառավարության նիստում ներկայացրեց կորոնավիրուսով պայմանավորված իրավիճակը:
«Այս պահին ունենք 13257 քաղաքացի, որոնք ակտիվ դեպքերն են, որոնցից 2000-ից ավելին հիվանդանոցներում են: Մահվան դեպքերով, ցավոք, հատել ենք 4000-ի սահմանը»: Անահիտ Ավանեսյանն անդրադարձավ նաև պատվաստումների թեմային.
«Պատվաստանյութն արդեն հասանելի է 18 տարին լրացած յուրաքանչյուր քաղաքացու: Հաջորդ շաբաթվանից կունենանք նաև շարժական թիմեր, որոնք քաղաքի բանուկ մասերում տեղակայված կլինեն ու մեկ քայլ կմոտեցնեն պատվաստման հնարավորությունը մեր քաղաքացիներին: Պատվաստման ռիսկը որևէ թեթև կամ ծանր կողմնակի ազդեցության գրեթե զրոյական է, եթե համեմատում ենք վարակվելու ու դրա հետևանքով առողջությանը հասցված ծանր ու մահվան դեպքերի հետ»:
Նախարարի պաշտոնակատարն ասաց, որ ինքն ու Տիգրան Ավինյանը երեկ պատվաստվել են ու իրենց լավ են զգում:
«Եկեք պայմանավորվենք, որ մեկ շաբաթվա ընթացքում դահլիճում ներկա բոլոր անձինք կպատվաստվեն»,- արձագանքեց վարչապետի պաշտոնակատարը՝ տեղեկացնելով, որ այս պահին պատվաստված է 2690 մարդ, որը, նրա խոսքով, խայտառակ ցուցանիշ է:
Կառավարության նիստն ամբողջությամբ՝ տեսանյութում: