Մայրաքաղաքում` Կիլիկիա թաղամասում, մայիսի 19-ին «Բալյան» ՓԲԸ-ի նախաձեռնությամբ իր դռները բացեց «Կիլիկիա» առևտրի կենտրոնը: Բացման արարողությունը նշանավորվեց տարածքի խնկարկմամբ և օրհնությամբ:
Նորաբաց կենտրոնն առանձնանում է քաղաքակիրթ առևտուր իրականացնելու համար նախատեսված բոլոր պայմաններով:
Անվանումը ևս պատահական չէ. պատմական Կիլիկիան աշխարհին հայտնի է եղել իր հմուտ առևտրականներով: Դրանից զատ` հիմնադիրները` Բալյան ընտանիքը, արմատներով պատմական Կլիկիայից է:
Նոր կենտրոնի բացումը կարևորվում է հատկապես նոր աշխատատեղերի ստեղծմամբ. պայմանագրեր են կնքվել 120 անհատ ձեռներեցների հետ, սակայն ընդհանուր առմամբ աշխատատեղերի թիվը հասնում է 350- 400-ի:
Ողջունելով մայրաքաղաքի բնակիչներին, շնորհակալություն հայտնելով պետական այրերին և անհատ ձեռներեցներին` ASEKOSE.am-ի թղթակցի հետ զրույցում հիմնադիրների հայրը` Հարություն Բալայանը, նշեց, որ կենտրոնի բացումը ուրախալի իրողություն է բոլորի համար` հատկապես կարևորելով այն հանգամանքը, որ այստեղ առկա են քաղաքակիրթ առևտուր կազմակերպելու բոլոր պայմանները:
Նրա խոսքով` ընտանիքը կարողացել է վերակենդանացնել մի կազմակերպություն, որն ըստ էության, հոգեվարքի մեջ էր: Տարածքում գործող կենտրոնը վաղուց էր դադարեցրել գործունեությունը և գտնվում էր սննանկացման վարույթում:
«Մենք կարողացանք մարդկանց հետ ճիշտ փոխհարաբերություններ կառուցել` իրենց իրավունքների շրջանակներում և նաև հաշվի առնելով մեր նախագահի ուղերձը` միջին և փոքր բիզնեսների հետ կապված, մենք ուսումնասիրեցինք դաշտը և անհատ ձեռներեցների հետ փոխադարձ պայմանագրերով իրավական դաշտում կարողացանք կազմակերպել կենտրոնի ստեղծումը: Այժմ մայրաքաղաքում ունենք նոր կենտրոն, որը բոլորինս է: Հույս ունեմ, որ կենտրոնի գործունեությունը բոլորիս համար փոխշահավետ կլինի»,- մեզ հետ զրույցում ասաց Հարություն Բալյանը:
Հարություն Բալյանը կարևորեց նաև միջանձնային փոխհարաբերությունները, նշելով որ բոլոր աշխատակիցները մի ընտանիքի անդամներ են, ովքեր աշխատում են միմյանց աջակցելով և համագործակցելով:
Բացման արարողությանը ներկա էր նաև Հայաստանի առևտրի պալատի գործադիր տնօրեն Արայիկ Վարդանյանը, ով կարևորեց կենտրոնի բացումը` առանձնացնելով հատկապես նոր աշխատատեղերի բացման հանգամանքը:
72157633525255823
