«ԵվրոԱսֆալտ» շինարարական ընկերությունը, որի գլխավոր տնօրենն ԱԺ նախագահ Ալեն Սիմոնյանի եղբայր Կառլեն Սիմոնյանն է, իշխանական շրջանակներում ունի մեկ այլ ծանոթ եւս, որը, թերեւս, պետական գնումներում այս նորաստեղծ ընկերության հաջողությունների գլխավոր «բանալիներից» է:
Այս մասին գրում է Hetq.am-ը։
Կ. Սիմոնյանի ղեկավարած ընկերությունը իր գոյության կարճ ժամանակահատվածում (ՓԲԸ-ն հիմնադրվել է 2020 թ. մարտին) ճանապարհների վերանորոգման 2 պայմանագիր է կնքել ՀՀ տարածքային կառավարման եւ ենթակառուցվածքների նախարարության (ՏԿԵՆ) ու Ապարանի համայնքապետարանի հետ, որոնցից առաջինի արժեքը 356 մլն դրամ է (սկզբնապես եղել է 368 մլն, բայց հետո նվազեցվել է), երկրորդինը՝ 287 մլն, այսինքն՝ դրանց ընդհանուր գինը 643 մլն դրամ է: Տվյալները վերցված են ֆինանսների նախարարության armeps.am գնումների համակարգից:
Քանի որ այս համակարգում տվյալները շարունակաբար թարմացվում են, այս պահին armeps.am-ում առկա է «ԵվրոԱսֆալտ» ՓԲԸ-ի հետ կնքված 4 պայմանագիր, իսկ ընդհանրապես ընկերությունը, նույն կայքի համաձայն, մասնակցել է 14 մրցույթի, որոնցից 4-ում եղել է 2 չափաբաժին, այսինքն՝ եղել է ընդհանուր 18 գնման առարկա:
Ընդ որում՝ բոլոր մրցույթները կազմակերպվել են այս տարի:
Պայմանագրերից 2-ը շինարարական ընկերությունը կնքել է ՏԿԵՆ-ի հետ, մյուս 2-ը՝ Արթիկի եւ Ապարանի համայնքապետարանների: Դրանց ընդհանուր գինը կազմել է 755 մլն դրամ։
Ինչ վերաբերում է «ԵվրոԱսֆալտի» մասնակցությամբ նշված 14 մրցույթներին (18 գնման առարկայով), դրանցից 11-ը կազմակերպել է ՏԿԵՆ-ը, 1-ական՝ Արթիկի, Ապարանի, Աշտարակի համայնքապետարանները:
Չնայած armeps.am-ի տվյալներով՝ «ԵվրոԱսֆալտը» հաղթող է ճանաչվել 4 անգամ, ֆիննախից «ՍիվիլՆեթին» հայտնել են, որ այս ընկերությունը հաղթել է ՏԿԵՆ-ի կազմակերպած եւս 2 մրցույթում, որոնցից մեկում եղել է գնման 2 չափաբաժին, այսինքն՝ 3 գնման առարկա: Ընկերության այս հաջողությունների եւ համապատասխան պայմանագրերի վերաբերյալ armeps.am-ում դեռեւս չկա ինֆորմացիա, բայց հայտնի է, որ 3 գնման առարկայի համար «ԵվրոԱսֆալտն» առաջարկել է ընդհանուր մոտ 2,6 մլրդ դրամ գին, որի մեջ հարկերը ներառված չեն:
Համաձայնեք, որ 2 տարվա կյանք չունեցող ընկերության համար նման պայմանագրեր կնքելը լուրջ հաջողություն է: Ինչպես կասեր ՏԿԵ նախկին նախարար Սուրեն Պապիկյանը, այստեղ բանալին «մրցույթ» եւ «հաղթել» բառերն են: Բայց իրո՞ք այդպես է: Եթե Փաշինյանի թիմի կողմից 24-ժամյա ռեժիմով քննադատվող նախկին իշխանությունների օրոք պետգնումների եւ այլ ոլորտներում ուրիշ բանալի բառեր կային, օրինակ՝ «խնամի», «ծանոթ», «բարեկամ», արդյոք դրանք ներկայում վերացել են:
Դա մոտավոր հասկանալու համար եկեք տեսնենք, թե ով է «ԵվրոԱսֆալտ» ՓԲԸ-ի սեփականատերը: Պետռեգիստրի համաձայն՝ 2020 թ. մարտին ընկերությունը հիմնել են երեւանցի Սվետլաննա Կարոյի Պողոսյանն (90 %) ու ՌԴ Նովոսիբիրսկ քաղաքի բնակիչ Լուսիկ Շահենի Գեւորգյանը (10 %): Պետռեգիստրում ՓԲԸ-ի կանոնադրության փոփոխության մասին տվյալ չկա, ինչից ենթադրելի է, որ մասնակիցների փոփոխություն տեղի չի ունեցել: Բայց փոխվել է գլխավոր տնօրենը. առաջին 4 ամսում այդ պաշտոնը զբաղեցրել է մոսկվացի Տիգրան Հարությունյանը, իսկ հետո նրան փոխարինել է երեւանցի Կառլեն Սիմոնյանը՝ ԱԺ նախագահի եղբայրը:
Չնայած նման դեպքերում պակաս կարեւոր չէ ընկերության գործադիր ղեկավարի ու ՀՀ բարձրաստիճան պաշտոնյայի ազգակցական կապը, էական է, թե ով է կանգնած այս ընկերության թիկունքում: 90 %-ի բաժնետեր, 41-ամյա Սվետլաննա Պողոսյանի անուն-ազգանունը, կարծես, ոչինչ չի ասում, բայց նրա հետ նույն հասցեում գրանցված է 24-ամյա Արգինե Արսենի Միքաելյանը, որն, ըստ իր ֆեյսբուքյան էջի, աշխատում է շինարարական մեկ այլ՝ «Թի Էս Քնսթրաքշն» ՓԲԸ-ում: Դատելով համատեղ գրանցումից եւ ֆեյսբուքյան գրառումներից՝ Ս. Պողոսյանը Արգինե Միքայելյանի մայրն է, այսինքն՝ Արսեն Միքաելյանի կինը: Իսկ 48-ամյա Արսեն Դերենիկի Միքաելյանը (ազգանունն այսպես է գրվում) «Թի Էս Քնսթրաքշն» ՓԲԸ-ի գլխավոր տնօրենն է:
Այս ընկերությունը, ինչպես «ԵվրոԱսֆալտը», հիմնադրվել է 2018-ի իշխանափոխությունից հետո՝ 2019-ի հուլիսին: Գրանցված է Երեւանի Արտաշիսյան 105/1 հասցեում, որտեղ գործում է նաեւ «ԵվրոԱսֆալտը»: Ընդ որում՝ Կառլեն Սիմոնյանը, համաձայն իր «LinkedIn» էջի, նաեւ «Թի Էս Քնսթրաքշնի» փոխտնօրենն է:
Ա. Միքաելյանը Մարտունու Ծակքար գյուղից է, այստեղ է հաշվառված: Նույն գյուղից է եւ նույն գյուղի հաշվառում ունի 2018-2021 թթ. Գեղարքունիքի մարզպետ, ՏԿԵ ներկա նախարար Գնել Սանոսյանը, ով նաեւ «Քաղաքացիական պայմանագիր» կուսակցության հիմնադիր անդամ է:
Նյութը՝ սկզբնաղբյուր կայքում
