ԱԺ Լուսավոր Հայաստան խմբակցության անդամ Սրբուհի Գրիգորյանը քիչ առաջ ԱԺ ամբիոնից կոչ արեց զորակոչել իրեն: Իր ելույթը սկսելով նրանից, որ Սյունիքի մարզի զոհերից մեկը կին է՝ կրտսեր սերժանտ Հասմիկ Արզումանյանը, Գրիգորյանը վսհատեցրեց՝ հայ կնոջ համար չկա դժվար ու վտանմգավոր աշխատանք ու չի լինելու:
«Եվ ես ինքս էլ պատրաստ եմ հենց այս պահին մեկնել առաջնագիծ, բայց ոչ թե ոգեւորելու զինվորներին, այլ իրապես կռվելու»,- ասաց նա: Գրիգորյանը նկատեց, որ թեեւ թվում է՝ կնոջ ձեռքը չպիտի գնա դիմացինի վրա կրակելուն, բայց հայ կինը իր տունը, ընտանիքը, երեխաներին պաշտպանելու համար հաճախ է զենք վերցնում եւ շատ դիպուկ է կրակում:
Հաշվի առնելով, որ Գրիգորյանի բառերով ասած՝ Հայաստանը վերամբարձ կռունկով չի տեղափոխվելու որեւէ այլ տեղ, իսկ մեր հարեւանները չեն փոխվելու, ուստի մենք չպետք է գլխիկոր կանգնենք սեւազգեստ մայրերի կողքին ու խղճահարություն տածենք, մենք պետք է առավել քաջ լինենք:
«Հարգելի գերագույն գլխավոր հրամանատար, խնդրում եմ հաշվի առեք խնդրանքս, զորակոչեք ինձ հենց առաջին վայրկյանին երբ իմ կարիքը լինի, եթե դա հենց այս պահն է, ուրեմն այս պահին: Զորակոչեք որպես Փառանձեմ թագուհու հետեւորդի, որպես այն քաղաքացու, ով ճակատագրի բերումով երկրին զավակ չի տվել ու անչափելի պարտք ու պարտականություններ ունի այս երկրի հանդեպ»,- ելույթը եզրափակեց պատգամավորը՝ իր վստահությունը հայտնելով այն կապակցությամբ, որ ազատամարտիկ հայրը հիմա ժպտում է երկնքից:
Հիշեցնենք, որ երեկվանից Ադրբեջանը ռազմական գործողություններ է սկսել Արցախի սահմանին: ՀՀ-ում ու Արցախում ռազմական դրություն է, սկսվել է զորահավաք:
