Հայերի դերը ֆաշիզմի դեմ պայքարում անգնահատելի է։ Այս մասին այսօր ասաց պաշտոնական այցով Հայաստանում գտնվող Ռուսաստանի արտգործնախարար Սերգեյ Լավրովը։ Նա Հայաստանի ազգային պատկերասրահում ՀՀ արտգործնախարար Զոհրաբ Մնացականյանի հետ միասին մասնակցեց Հայրենական Մեծ պատերազմի հաղթանակի 75-ամյակին նվիրված ցուցահանդեսի բացմանը:
Լավրովի խոսքով`ցուցահանդեսը մանրամասն պատմում է, թե ինչպես են մեր հայրերն ու պապերը անհավատալի ջանքերի գնով փրկել մարդկությանը ֆաշիզմից: Նա շեշտեց, որ հայ ժողովրդի զավակները ԽՍՀՄ մյուս ժողովուրդների հետ ուս-ուսի տված մասնակցել են ֆաշիստական բանակի դեմ հերոսական մարտերին, ազատագրել երկիրը և հասել մինչև Բեռլին:
«Հայ ժողովուրդը կարող է հպարտանալ իր հերոսներով: Նրանք անգնահատելի ներդրում են ունեցել ֆաշիզմի ջախջախման ընդհանուր գործում», - ասաց Լավրովը:
Նրա խոսքով ՝ Ռուսաստանի համար հատկապես կարևոր է, որ ՀՀ վարչապետ Նիկոլ Փաշինյանը առաջիններից մեկն էր, որ պատասխանեց Ռուսաստանի Դաշնության Նախագահ Վլադիմիր Պուտինի հրավերին՝ մասնակցելու Հայրենական մեծ պատերազմում տարած հաղթանակի 75-ամյակին:
«Ռուսների և հայերի դարավոր բարեկամությունը, կարծրացած լինելով ծանր ռազմական փորձություններով, շարունակում է մնալ ռուս-հայկական ռազմավարական գործընկերության և դաշինքի հետագա ամրապնդման բանալին՝ ի շահ մեր քաղաքացիների, ի շահ Կովկասում և ամբողջ տարածաշրջանում անվտանգության և կայունության», - ասաց Լավրովը՝ նշելով, որ պատմությունը վերաշարադրելն անընդունելի է:
Նշենք, որ պաշտոնական այցի ընթացքում Լավրովը հանդիպումներ կունենա ՀՀ վարչապետ Նիկոլ Փաշինյանի, ՀՀ նախագահ Արմեն Սարգսյանի, ինչպես նաև իր հայ գործընկերոջ ՝ Զոհրաբ Մնացականյանի հետ:
Դիտեք նաև՝
