ՀՀ ԱԳՆ մամուլի խոսնակ Տիգրան Բալայանն արձագանքել է մի շարք լրատվամիջոցների հարցերին` ուղղված ՌԴ Արտաքին գործերի նախարար Սերգեյ Լավրովի հայտարարություններին:
«Մենք հետևում ենք միջազգային արձագանքներին Հայաստանում տեղի ունեցող ներքին գործընթացների շուրջ, որոնք պայմանավորված են կառավարության ներքին առաջնահերթություններ հանդիսացող իրավական պետության և արդարադատության անկախ համակարգի կայացմամբ, կոռուպցիայի դեմ պայքարով։ Այս գործընթացները փոխկապակցված չեն Հայաստանի արտաքին քաղաքականության հետ և չպետք է տարընթերցման առիթ հանդիսանան։
Այս առնչությամբ վերահաստատում ենք, որ մեր արտաքին քաղաքական առաջնահերթությունները, որոնք հստակորեն ամրագրված են խորհրդարանի կողմից հաստատված կառավարության ծրագրում, ուղղված են հայ-ռուսաստանյան դաշնակցային հարաբերությունների հետագա ամրապնդմանն ու խորացմանը, ՀԱՊԿ և ԵԱՏՄ շրջանակներում փոխգործակցության արդյունավետության բարձրացմանը։ Մենք անշեղորեն հետևում ենք հռչակված ուղեգծին»։
Հիշեցնենք, որ ՌԴ արտաքին գործերի նախարար Սերգեյ Լավրովն ասել էր, թե Հայաստանում ընթացող գործընթացները չեն համապատասխանում իշխանությունների խոստումներին:
