Միքայել Մինասյանի նկատմամբ հարուցված գործով քաոսն առաջանում է միայն այն պատճառով, որ նախաքննական մարմնի, դատախազության ու ընդհանրապես իշխող քաղաքական ուժի միակ նպատակը ոչ թե որեւէ քրեական գործով, մասնավորապես այս գործով, օբյեկտիվ նախաքննություն իրականացնելն է, հանգամանքների ի հայտ բերումն ու պարզումը, այլ Միքայել Մինասյանի կալանքի որոշումը ստանալը՝ քաղաքական ինչ-ինչ նպատակներով օգտագործելու, հասարակությանն իր բուն խնդիրներից շեղելու, այն որպես իշխանության հաջողություն ներկայացնելու համար։ Այս մասին tert.am-ի հետ զրույցում ասել է Սուրբ Աթոռում ՀՀ նախկին արտակարգ եւ լիազոր դեսպան Միքայել Մինասյանի փաստաբան Միհրան Պողոսյանը։
«Այս քրեական գործն օրինականության, օրինական քրեական գործի հետ որեւէ աղերս չունի, այսինքն՝ չի կարելի այս քրեական գործի նախապատմությունը, քննման ընթացքը, ձեւը, դատարան ներկայացվող միջնորդությունները համադրել քրեական դատավարության օրենսգրքի հետ։ Այստեղից էլ գալիս է այն պնդումը, որը մենք ի սկզբանե հայտնել ենք, որ օրվա իշխանությունն իր քաղաքական հակառակորդների դեմ օգտագործում է քրեական գործիքներ։ Ներկայացնեմ նախապատմությունը եւ մարդիկ թող իրենք եզրակացություններ անեն, թե ինչ է կատարվում այս քրեական գործով։ Գաղտնիք չէ, որ արդեն 4-րդ անգամ պետք է քննարկվի Միքայել Մինասյանին կալանավորելու միջնորդությունը, նախորդ 3 դեպքում դատարաններն արձանագրել են, որ քննչական ու դատախազական մարմինները թույլ են տալիս օրինախախտումներ։ Եթե մենք ուզում ենք ապրել այնպիսի Հայաստանում, որում քննվող քրեական գործով անցնող անձի կալանավոչումը լինի օրինական, այս ընթացակարգային խախտումները, որոնք շատ մեծ նշանակություն ունեն, պետք է բացառվեն, որպեսզի հանրությունն էլ հավատ ունենա քրեական գործերի հանդեպ։ Իսկ այս պարագայում, առաջին անգամ քննչական մարմինն ու դատախազությունը փորձեցին կալանավորման որոշումը ստանալ, դատարանն ակնհայտ օրենքի խախտումով տվեց իր համաձայնությունը, ինչն արձանագրեց Վերաքննիչ դատարանը, որ օրենք է խախտվել։ Կալանավորման եւս մեկ միջնորդյուն քննվեց բոլորովին վերջերս՝ օգոստոսի 21-ին։ Դատախազությունը դիմել է դատարանին՝ խնդրելով չքննարկել կալանավորման միջնորդությունը։ Դատախազությունը նման լիազորություն ունի, բայց խնդրում էր չքննարկել կալանավորման միջնորդությունը, որովհետեւ միջնորդությունը հետ են վերցնում հետագայում կալանավորման միջնորդությունը կրկին ներկայացնելու համար», ասել է Միհրան Պողոսյանը։
Միքայել Մինասյանի պաշտպանի խոսքով՝ այդ ընթացքում քննությունն իրականացնող մարմինները համապատասխան դատավոր էին ուզում գտնել․
«Բայց դատախազությունը կամ քննչական մարմինը որեւէ պարագայում միայն մեղադրելու գործառույթ չունի, այլ պարտավոր են հավաքել նաեւ անձին արդարացնող, նրա կալանավորումը բացառող փաստական տվյալներ։ Եվ դատախազությունը խնդրում է՝ մի քննարկեք այս միջնորդությունը, մենք գնալու ենք եւ լրացուցիչ հիմքեր ենք բերելու, որ այս մարդը կալանավորվի։ Այսինքն, ի սկզբանե, այս գործի ամբողջ տրամաբանությունը, ցանկությունը, նպատակը Միքայել Մինասյանի կալանավորման որոշում ունենալն է, որը հետագայում կօգտագործվի քաղաքական ենթատեքստով։ Ընդ որում, այս էպոպեան սկսվել է մարտի 17-ից։ Ընթացքում դատախազությունը եւս մեկ անգամ է դիմել դատարան, հուլիսի 3-ին, եւ դատարանը կրկին մերժել է, որովհետեւ այդ պահին դեռ նախորդ միջնորդությունը քննարկման առարկա չէր դարձել։ Մի միջնորդությունը չքննարկած մյուսն էին ներկայացնում, փորձելով պարզել՝ իրենց սրտին հաճո դատավո՞ր է քննարկելու միջնորդությունը, թե՝ ոչ։ Դրա տրամաբանական շարունակությունն էին սեպտեմբերի 3-ի գործողությունները․ միջնորդությունը մակագրվել էր Ավանի նստավայրի դատավոր տիկին Մելիքսեթյանին, որը, երեւի թե, ամբողջությամբ կառավարելի եւ ընդունելի դատավոր չէր իշխանության համար, եւ նա գրությամբ գործը հանձնել էր դատարանի նախագահին՝ վերամակագրման։ Կարծում եմ, այստեղ հարգանքի խոսքեր պետք է ասենք տիկին Մելիքսեթյանին, որն ապօրինի գործողությունների չէր գնացել։ Բայց մենք պետք է դիտարկենք, որ դատավոր Մելիքսեթյանն, ի վերջո, որպես իրական դատավոր չէր գործել, որովհետեւ իրական դատավորը պետք է քննարկեր տվյալ միջնորդությունն ու օբյեկտիվ որոշում կայացներ, այլ ոչ թե, այսպես ասած, փախուստի դիմեր», ասել է նա։
Ըստ Միհրան Պողոսյանի՝ նիստի օր էր նշանակված՝ սեպտեմբերի 3-ին, ժամը 22-ին, սակայն, նրա խոսքով, անհասկանալի պատճառներով նիստը չի կայացել, ծանրաբեռնվածությունը պատճառաբանելով դատաբորը գործը հետ է վերադարձրել դատարանի նախագահին։
«Ու երբ դրանից հետո հայտնվում է պարոն Մանվել Շահվերդյանը, մեզ մոտ կասկածներ են առաջանում նրա՝ օբյկտիվ դատավոր լինելու հանգամանքի մասին, հաշվի չառնելով դատավորի անձը։ Այս ամենն ակնհայտ է դարձնում, որ դատախազության նպատակը սրտի դատավոր գտնելն է։ Տեսեք, արդեն 3 անգամ դատարանը մերժել է Միքայել Մինասյանին կալանավորելու դատախազության միջնորդությունը, բոլորը տարբեր հիմքերով, բայց ունենք 3 օրինական որոշում։ Քրեական դատավարության օրենսգիրքը սահմանում է, որ կարելի է անձին կրկին կալանավորելու միջնորդություն ներկայացնել, եթե ի հայտ են եկել նոր հանգամանքներ։ Մենք օգստոսի 21-ին ունենք որոշում, որով մերժվել է քննիչի միջնորդությունը, եւ ես ձեզ վստահեցնում եմ, որ դրանից հետո որեւէ նոր հանգամանք ի հայտ չի եկել, որը թույլ կտար վարույթն իրականացնող մարմնին նման միջնորդությամբ հանդես գալ։ Իսկ մեղադրանքների լրացումները չեն կարող համարվել նոր հանգամանք։ Մենք ունենք նոր միջնորդություն, որը խմբագրված է, բառակապակցությունների տեղերն են փոխված, ունենք տառատեսակի փոփոխություն, բայց դրանք նոր հանգամանքներ չեն, նոր փաստական տվյալներ, որոնք քննիչին մինչեւ այդ հայտնի չեն եղել, օգոստոսի 21-ից հետո որեւէ շարժ տեղի չի ունեցել, որը քննիչին թույլ կտար նոր փաստական հանգամանքներ բերել։ Դեռեւս չեմ խոսում այն հանգամանքի մասին, որ ՊԵԿ քնննչական վարչությունը Միքայել Մինասյանի գործը քննելու համար պատշաճ սուբյեկտ չի հանդիսանում։ Միքայել Մինասյանի մեղադրանքը ապօրինի հարստացումն է եւ հայտարարագրում կեղծ տվյալներ ներկայացնելը, որի վերաբերյալ քրեական գործերը կարող են քննվել միմիայն Հատուկ քննչական ծառայությունում։ ՊԵԿ քննչական վարչությունը պատրաստակամորեն գործիք է դառնում այս քաղաքական իշխանության համար, քանի որ ՀՔԾ-ն հանրության աչքում արդեն իսկ վարկաբեկվել է որպես քաղաքական պատվեր կատարող մարմին։ Այս քրեական գործը եւս տրամադրելու ժամանակ ՀՔԾ-ն այդ պիտակից չի ազատվել, ընտրել են այնպիսի մարմին, որ հանրությունը լսի, թե ՊԵԿ քննչական վարչությունն է քննում, չմտածի, թե էլի պատվեր է», նշել է Միհրան Պողոսյանը։
Փաստաբանը տեղեկացրել է, որ Միքայել Մինասյանի հայտարարագիրը լրացնող անձը հարցաքննվել է․
«Այդ մասին տեղեկացանք հաջորդ միջնորդությունը ներկայացնելու ժամանակ։ Մեր պնդումները հիմնավորվեցին, որ տեխնիկական վրիպակ է տեղի ունեցել, իսկ քննչական մարմինը քար լռություն է պահպանում եւ ընդհանուր գնահատական չի տալիս այս դրվագի վերաբերյալ։ Նրանք մնում են իրենց կարծրատիպերի մեջ, որ իրենց առաջ քաշած վարկածը կարող է օբյեկտիվ իրականության հետ աղերս ունենալ, մինչդեռ ապացույցներն այլ բանի մասին են խոսում, որ տեխնիկական վրիպակ է եղել։ Քանի որ միակ նպատակը կալանավորումն էր, ինքնին այս պրոցեսները խնդրահարույց են լինում, ես դրա համար եմ պնդում, որ օբյեկտիվ նախաքննության մասին խոսք լինել չի կարող, քննչական մարմինը լծվել է մի անօրինական աշխատանքի՝ հանրությանը ներկայացնել, որ առկա է Մինասյանի կալանքի որոշում», ասել է Մ․Պողոսյանը։
Մ․Մինասյանի փաստաբանի խոսքով՝ 4-րդ միջնորդության վերաբերյալ դատավոր Մանվել Շահվերդյանին նախորդ միջնորդությունների վերաբերյալ նախաքննական մարմինը տվյալներ չի տրամադրվել․
«Մենք ենք տրամադրել, միջնորդել ենք պահանջել նախորդ նիստերի նյութերը, որպեսզի դատավորը եւս համոզվի, որ այստեղ նոր հանգամանք առկա չէ եւ քննիչն իրավունք չունի նոր միջնորդություն ներկայացնել կալանավորման մասին։ Դատավորը հիմա պետք է նախորդ նյութերը նայի եւ համեմատի նոր միջնորդության հետ, որ տեսնի ինչ նոր հանգամանք կա, ինչն այնտեղ չկա, եթե չհաշվենք բառակապակցությունների տեղաշարժը։ Հրահանգ չլինելու դեպքում բացառվում է, որ որեւէ դատավոր կկայացնի կալանավորելու որոշում, հիմա մտածում են՝ կարո՞ղ ենք այս դատավորին հրահանգ իջեցնել, ճնշում գործադրել, թե ոչ, սրտի՞ դատավոր է, թե ոչ։ Օդում կախված է ճնշումը, քանի որ դատավորները գիտեն իշխանությունների ցանկությունը, բայց արդյո՞ք այդքանը բավարար է ցանկալի որոշումը ստանալու համար։ Հիմա ընտրել են Մանվել Շահվերդյանին եւ մենք իրավունք ունենք դատարանին չվստահել եւ մենք անպայման դատավորին ինքնաբացարկի միջնորդություն ենք ներկայացնելու», ամփոփել է Սուրբ Աթոռում ՀՀ նախկին դեսպանի փաստաբանը։
