Երեւանի ավագանու «Ելք» խմբակցության անդամներն այսօր՝ օգոստոսի 28-ին, ավագանու քննարկմանն են ներկայացրել մի շարք փողոցների անվանակոչության վերաբերյալ որոշման նախագծեր: Այս մասին Facebook-ի իր էջում ներկայացրել է Երեւանի ավագանու «Ելք» խմբակցության անդամ Արայիկ Հարությունյանը, ով ներկայացրել է նաեւ որոշումների նախագծերի լուսանկարները:
Մասնավորապես, առաջարկվում է Արաբկիր վարչական շրջանի Կասյան փողոցն անվանակոչել կաթողիկոս Վազգեն Առաջին վեհափառի անվամբ, Շենգավիթ վարչական շրջանի Ֆրունզեի փողոցը` Ապրիլյան հերոսների:
Մեկ այլ որոշման նախագծով առաջարկվում է Ամիրյան փողոցը կոչել Վռամշապուհ արքայի անունով, Դավթաշեն վարչական շրջանի Միկոյան փողոցը` Քըրք Քըրքորյանի անունով:
Աջափնյակ վարչական շրջանի Լենինգրադյան փողոցն առաջարկվում է անվանափոխել Լեոնիդ Ազգալդյանի, Իսակովի պողոտայից սկիզբ առնող եւ Լենինգրադյան փողոցում ավարտվող նորակառույց փողոցը` Մոնթե Մելքոնյանի անունով:
Նշենք, որ Երեւանի ավագանու առաջիկա նիստը նախատեսված է սեպտեմբերի 12-ին:
