Համացանցում հայտնվել է տեսանյութ, որում Լարսում «գերի ընկած» հայ վարորդներն ահազանգում են, որ հայկական բեռնատարների կուտակման հարցը չի լուծվել: «Վերին Լարս» անցակետում իրավիճակը չի փոխվել: Առավոտից բեռնատար մեքենաների մեծ կուտակում կա: Այս մասին հայտնել է նաև Տրանսորտի, կապի և տեղեկատվական տեխնոլոգիաների տրանսպորտի վարչության պետի տեղակալ Դավիթ Մելքոնյանը:
«Չորեքշաբթի կեսօրին «Վերին Լարս» անցակետում կուտակվել է մոտ 100-120 բեռնատար մեքենա։ Հիմնական կուտակումները վրացական կողմից դեպի ռուսական կողմ, բայց երթևեկը դժվարացել է երկու ուղղություններով»,– ասել է Մելքոնյանը։
Նրա խոսքով, իրավիճակը բացատրվում է սեզոնայնությամբ, կապված է անցակետի թողունակության հետ, այլ պատճառներ չկան։
Նշենք, որ արդեն մի քանի օր է, ինչ «Վերին Լարս» անցակետում կուտակվում են Հայաստանց մեկնող բեռնատար մեքենաներ, որոնք չեն կարողանում անցնել անցակետը: Ինչպես նշում են ականատեսները, ավտոմեքենաները հիմնականում բեռնված են հայկական գյուղմթերքով, սակայն չեն կարողանում հատել սահմանը։
