«Լիդիան Արմենիայի» գործողությունները պայմանավորված ցանկացած պահնորդական կազմակերպություն ներգրավելու անհրաժեշտության գնահատմամբ, դրա արդյունքում վերջիններիս հետ կնքվող պայմանագրերով, դրանց լուծմամբ, նոր պայմանագրերի կնքմամբ և այլն, իհարկե, իրավաչափ են, որովհետև ցանկացած տնտեսվարող սուբյեկտ, այդ թվում՝ «Լիդիան Արմենիան», ազատ է ընտրելու իր պայմանագրորդներին և փոխելու դրանց ցանկացած պահի: Դրա հետ կապված բոլոր քննարկումներն անտեղի են»,-այս մասին Asekose.am-ի հետ զրույցում ասաց «Լիդիան Արմենիայի» իրավաբան, փաստաբան, ԵՊՀ դասախոս Նունե Հայրապետյանը:
Նունե Հայրապետյանը անդրադարձավ նաև խոսակցություններին, որոնց համաձայն՝ պահնորդների խումբը բերվել է, որպեսզի հնարավոր ագրեսիայի դեպքում պատրաստ լինեն ցանկացած հանգուցալուծման.
«Եթե կա ագրեսիվ մոտեցում ցուցարարների կողմից, դրանով պետք է անհանգստացած լինի ՀՀ ոստիկանությունը, որն ունի հասարակական կարգը պահպանելու պարտականություն, տեղի բնակչության իրավունքների և անվտանգության ապահովման հարցերով պահնորդական ընկերությունը չպետք է մտահոգված լինի: Ցանկացած դեպքում պահնորդական ընկերության գործունեությունը դրանով չէ պայմանավորված, իսկ ցուցարարների ագրեսիան պետք է անհանգստացնի ՀՀ ոստիկանությանը և իրավասու այլ մարմիններին, որովհետև նրանց վրա է դրված տեղի բնակչության անվտանգությունն ապահովվելու պարտականությունը, որը նրանք փաստացիորեն չեն իրականացնում, և մարդիկ զրկված են աշխատանքի իրավունքից, քանի որ իրենց կյանքի և առողջության համար մտավախություն ունեն: Ագրեսիայի դրսևորման մասին ոչինչ չեմ կարող ավելացնել, միայն գիտեմ, որ ընկերությունը հաղորդումներ է տվել, քանի որ մի քանի անգամ գույքը փչացնելու փորձ են արել, ինչպես նաև ընկերության տարածք ներխուժելու փորձեր են արվում»,-եզրափակեց Նունե Հայրապետյանը:
