«Շատ հնարավոր է, որ գալիք շաբաթ արտահերթ խորհրդարանական նիստ ունենանք, և հարցեր լինեն քննարկելու»,-այս մասին «Իմ քայլը» խմբակցության հրավիրած նիստի ավարտից հետո լրագրողներին ասաց ԱԺ փոխխոսնակ, «Իմ քայլը» խմբակցության պատգամավոր Ալեն Սիմոնյանը:
Անդրադառնալով «Իմ քայլը» խմբակցության նիստին, Ալեն Սիմոնյանն ասաց. «Սա մեր խմբակցության հերթական հանդիպումն էր, որի ժամանակ տարբեր հարցեր քննարկվեցին, բայց ոչ այն կարևորության, որը ենթադրում եք: Վարչապետը ելույթ ունեցավ, հետո հնչեցին հարցեր, հետո հնչեցին խմբակցության անդամների ելույթներ, վերջում վարչապետը ամփոփիչ ելույթով հանդես եկավ»:
Ալեն Սիմոնյանն անդրադարձավ նաև Ռոբերտ Քոչարյանի խափանման միջոցը փոխվելուն, լրագրողները հետաքրքվեցին արդյո՞ք դա իշխանություններին անհանգստացնում է:
«Անհանգատացնում է մարդկանց զայրույթն ու ընկալումը: Ինձ էլ էին գրել, դրա համար իմ վրա եմ օրինակը բերում, գրել էին թե մեկին բռնել եք, մյուսին բաց եք թողնում: Մենք դատարանի վճիռներն իմանում ենք բոլորի հետ միասին, այսինքն, երբ որ դրանք հրապարակային են դառնում, մենք որևիցե մեկին չենք բռնում և բաց չենք թողնում: Դա քաղաքական որոշում չի եղել ու ՀՀ-ում երբևէ նման բան չի կարող լինել»,-ասաց Սիմոնյանը:
