ՀՀ ԱԳ փոխնախարար Վահան Կոստանյանը, անդրադառնալով ապրիլի 5-ին Բրյուսելում սպասվող Փաշինյան-Բլինքեն-Ֆոն դեր Լայեն հանդիպմանը, լրագրողների հետ ճեպազրույցում ասել է․ «Քննարկելու ենք Հայաստան-Եվրոմիություն, Հայաստան-ԱՄՆ երկկողմ և նաև եռակողմ հարաբերությունները։ Աշխարհաքաղաքական մեծ իրադարձություն պետք չէ այս միջոցառումը դարձնել, թեպետ այն մեզ համար շատ կարևոր է։ Այն երկրները, որոնք դեմ են նման ֆորմատով համագործակցությանը, հաճախ մեդիադաշտում փորձում են ստեղծել առավել մեծ ակնկալիքներ, քան վաղվա միջոցառումից կարելի է ունենալ՝ հետագայում հանրության մոտ հիասթափություն առաջացնելու համար»,- ասել է նա՝ հաստատելով, որ անվտանգային հարցեր չեն քննարկվելու. միջոցառումը վերաբերելու է տնտեսական և հումանիտար հարցերին։

***

Քաղաքագետ Սուրեն Սուրենյանցի ֆեյսբուքյան գրառումը․ «Եթե կարճ նկարագրենք ԱՄՆ Պետքարտուղարի և Ադրբեջանի նախագահի երեկվա հեռախոսազրույցը, ապա դա նրա մասին է, որ Բլինքենն Ալիևին հավաստիացրել է, որ ապրիլի 5-ին Հայաստանի վարչապետի, Միացյալ Նահանգների պետքարտուղարի ու Եվրոպական հանձնաժողովի նախագահի Բրյուսելում նախատեսված հանդիպումն ուղղված չէ Ադրբեջանի դեմ։
Սակայն առանց այդ զանգի էլ բոլորի համար պարզ էր, որ Արևմուտքը չի կարող և չի լինելու Հայաստանի դաշնակիցն ընդդեմ Ադրբեջանի:
Դա շատ լավ հասկանում է նաև Ալիևը, որի «մտահոգությունն» ամենևին էլ պայմանավորված չէ այն հանգամանքով, որ ապրիլի 5-ից հետո «ուժեղացած» Հայաստանը մարտահրավեր է ստեղծելու Ադրբեջանի համար: Նման պատրանքներով կարող են միայն մեր պսևդոարևմտամետներն ապրել:
Ալիևը շատ լավ հասկանում է, որ ապրիլի 5-ի հանդիպումն ուղղված է Ռուսաստանի և Իրանի դեմ, ուրեմն՝ նրա հիմնական «մտահոգությունն» այն է, թե ինչպես, մի կողմից, այդ փաստը «վաճառի» Մոսկվայի և Թեհրանի վրա, մյուս կողմից՝ Վաշինգթոնում կապիտալիցազնի իր աճող դերակատարությունը, մանավանդ այն պարագայում, երբ Իրանի շուրջ օղակը սեղմվում է»։