Այսօր ԱԺ-ում լրագրողների հետ զրույցում «Ելք» խմբակցության պատգամավոր Էդմոն Մարուքյանը տեղեկացրել է, որ վարչապետ Նիկոլ Փաշինյանն այսօր դարձյալ գալու է խորհրդարան` շարունակելու քննարկումները քաղաքական ուժերի ու խմբակցությունների հետ:
Անդրադառնալով Նիկոլ Փաշինյանի հետ երեկ ԱԺ նախագահի աշխատասենյակում տեղի ունեցած հանդիպմանը` Էդմոն Մարուքյանը հայտնել է, որ մի քանի ժամ ինքը գտնվել է այնտեղ.
«Օրեր անց Փաշինյանը հրաժարական կտա վարչապետի պաշտոնից: 14 օր շարունակ նոր վարչապետ չի առաջադրվի ու չի ընտրվի ԱԺ-ի կողմից, որից հետո խորհրդարանը կարձակվի օրենքի ուժով, և կհայտարարվեն արտահերթ խորհրդարանական ընտրություններ»,- ասել է Մարուքյանը:
Նրա խոսքով` ԱԺ մյուս 3 խմբակցությունների ներկայացուցիչները պնդել են, որ պատրաստ են արտահերթ ընտրությունների, բայց մայիս-հունիս ամիսներին` այն բանից հետո, երբ կընդունվի նոր Ընտրական օրենսգիրքը:
«Եթե նույնիսկ նոր ԸՕ-ն չընդունվի 1 ամսվա մեջ, ապա պետք է գնանք ընտրության հին օրենսգրքով: Եթե նույնիսկ հին օրենսգիրքը մնա, ապա այս քաղաքական իրավիճակում ռեյտինգային ցուցակով օլիգարխները չեն անցնի խորհրդարան»:
Մարուքյանը, սակայն, վստահեցրեց, որ նոր օրենսգիրքը պատրաստ է, և այն հնարավոր է նույն հապշտապ կարգով ընդունել, ինչպես երեկ ՀՀԿ-ն փորձում էր ընդունել իր հեղինակած «ԱԺ կանոնակարգ» օրենքի փոփոխությունների նախագիծը: