ՀՀ ոստիկանությունը հերքում է տեղեկությունը, թե Արցախում հունվարի 30-ին մահացած զինծառայողի հարազատներին ոստիկանները բերման են ենթարկել՝ նրանց «զսպելու» համար։ Այս մասին ասված է ՀՀ ոստիկանության ֆեյսբուքյան էջում։
«Ֆեյսբուքյան որոշ օգտատերեր տեղեկատվություն էին տարածել, թե իբր զոհված զինծառայողի հարազատներին ոստիկանները բերման են ենթարկել՝ նրանց «զսպելու» համար:
Պարզաբանում ենք, որ այդ տեղեկությունը բացարձակ սուտ է և որևէ աղերս չունի իրականության հետ: Օգտատերերին կրկին հորդորում ենք ապատեղեկատվություն չտարածել:
Ցավակցում ենք զոհված զինվորի հարազատներին»,-նշված է հայտարարության մեջ:
Հիշեցնենք` զինծառայող Վահրամ Ավագյանի հարազատները, չհավատալով ինքնասպանության նախնական վարկածին, ի նշան բողոքի, զինվորի դին բերում էին Երևան՝ փակելով Արմավիր-Երեւան մայրուղին:
ՀՀ պաշտպանության նախարարը բանակցեց հարազատների հետ, որից հետո նրանք դադարեցրին ակցիան:
