Անեսթեզիոլոգ-ռեանիմատոլոգ Լիլիթ Մուսեյանն այսօր միասնական տեղեկատվական կենտրոնում մամուլի ասուլիսի ժամանակ նշեց, որ բժիշկներն այսօր պայքարում են երկու ճակատում՝ ռազմաճակատում և նոր կորոնավիրուսի ճակատում:
Նա նշեց, որ կորոնավիրուսի գործընթացներում նահանջ ունենք, քանի որ «մեր հասարակության մի հատված դադարեցրել է պատշաճ պայքար մղել հիվանդության դեմ»:
Նա նշեց՝ մեր ողջ ներուժը այսօր պետք է ուղղվի ռազմի ճակատ:
«Վարակվածները դուրս են մնում հայրենիքի համար մղվող պայքարից, դուրս են մնում նաև վարակիչ և վարակված լինելու մեջ կասկածվողները: Ի վերջո, մենք վարակը կարող ենք փոխանցել սահմաններում մարտնչողներին, պետք է առողջ լինեն մեր հայրենիքի համար մարտնչողները:
Պատահական չէ, որ թշնամին մեզ վրա հարձակվելու համար ընտրել է համաճարակային ժամանակաշրջանը, նա իրեն դաշնակից է ընտրել կորոնավարակը: Հաղթելով նրա դաշնակցին՝ մենք կթուլացնենք հենց իրեն և կմոտեցնենք հաղթանակը: Առաջին հերթին, մենք ինքներս պետք է լինենք կարգապահ և խստապահանջ մյուսների նկատմամբ»,- ասաց նա:
