ԱԺ-ում Մալթայի հետ մշակութային ոլորտում համագործակցության մասին համաձայնագրի ներկայացման ժամանակ ԲՀԿ խմբակցության պատգամավոր Միքայել Մելքումյանը մշակույթի նախարարի տեղակալ Նազենի Ղարիբյանին հորդորել է խորհրդարան գալ պատրաստված:
«Եթե եկել եք պառլամենք, պետք է պատրաստված գաք: Եթե այս տիպի համաձայնագրեր են գալիս, որոնց ֆինանսական ազդեցությունը պետք է գնահատենք, Դուք ասում եք՝ ծախսի մեջ ոչ մի փոփոխություն չկա, բայց եթե մշակույթի ոլորտի այդ ծախսը փոփոխվում է, ինչ-որ այլ ծախսի հաշվին է, չէ՞: Հիմա ի՞նչն եք կրճատում: Եթե նմանատիպ համաձայնագրերի քանակի և ֆինանսական ծավալների մասին տեղեկատվություն ունեք, ասեք, որ մենք հասկանանք, թե նմանատիպ համաձայնագրերը ի՞նչ ֆինանսական ազդեցություն ունեն և ի՞նչ են տալիս մեզ»,- փոխնախարարին դիմեց Մելքումյանը:
Ի պատասխան՝ Նազենի Ղարիբյանը նշել է, որ նման համաձայնագրերը բխում են ՀՀ Կառավարության ծրագրից. «Դրանում առանձին սահմանված է, որ ոչ միայն հայ մշակույթի հանրահռչակումն է արտերկրում, այլ նաև այլ երկրների մշակույթների հանրահռչակումն է մեր երկրում՝ ի շահ նաև մեր ժողովրդի մշակութային և կրթական ցենզի բարձրացման»:
