ԱԺ պատգամավոր Սիփան Փաշինյանը ֆեյսբուքյան գրառում է արել եւ անդրադարձել մամուլում ստի և կեղծիքի տարածման ծիծաղելիության աստիճանին:
Նա նշում է, որ մի քանի օր է՝ մամուլում նյութ են գովազդում՝ իբրև ինքն ու Սյունիքի գործարարներից մեկը կազմակերպել են Քաջարանի դեպքերը:
«Երեկ նոր թափ առավ այդ չորացած «աղբյուրներից» ստացված լուրը:
Այսօր սրճարաններից մեկում ես և իմ գործնկերներ Տիգրան Կարապետյանը եւ Արեն Մկրտչյանը սուրճ խմելու ժամանակ քննարկում էինք մամուլի ստի և կեղծիքի տարածման ծիծաղելիության աստիճանը և որոշեցինք թեստ անել»,- նշել է Փաշինյանը:
Պատգամավորն առաջարկել է նկարվել երեքով և տեղադրել «Ֆեյսբուքում». «Հետո սպասում ենք՝ տեսնենք՝ ինչքան ժամանակ հետո ձեզ հայտնի կայքերից մեկը կգրի, որ Տիգրան Կարապետյանն էլ կապ ունի Քաջարանի դեպքերի հետ»,- առաջարկել է պատգամավորը:
Պարզվում է՝ վատ արդյունքներ չեն եղել: Նշվում է, որ մոտ 40 րոպեից հայտնվել է այդ «սենսացիոն լուրը» կայքերց մեկում:
«Կայքի անունը միտումնավոր չեմ նշում՝ այն չտարածելու համար»,- գրել է նա եւ հավելել.
«Ստով և կեղծիքով, ամբողջ պետական լծակներով և դիկտատուրայով չկարողացաք իշխանություն պահել: Հիմա ինչ նպատակով էլ այսքան կեղծիք եք լցնում դաշտ՝ տրամաբանորեն դատապարտված է ձախողման:
Սիսակ Գաբրիելյանն էլ կապ ունի, նշանակվելու է ԶՊՄԿ-ի տնօրեն»: