«Պայքար անանուն աղբյուրների՞, թե՞ մամուլի ազատության դեմ» թեմայով առցանց քննարկման ժամանակ ԱԺ «Իմ քայլը» խմբակցության պատգամավոր Հայկ Կոնջորյանը նկատեց, որ թյուր տպավորություն է ստեղծվում, թե ցանկանում են սահմանափակել լրատվամիջոցների իրավունքները: «Օրինակ, թելեգրամյան ինչ-որ ալիք գրում է, որ ադրբեջանցիները քեֆ են անում Երևանի կենտրոնում: Եվ ահա հանրության շրջանում արդեն կայացած որևէ լրատվամիջոց վերցնում է նույն տեղեկությունը և, հղում կատարելով թելեգրամյան ալիքին, հրապարակում: Ենթադրենք, գնում ենք իրական լրատվամիջոցի մոտ և պահանջում տվյալներ ու փաստեր դրա վերաբերյալ, իսկ լրատվամիջոցն ասում է, որ ինքը չի ասել, այլ թելեգրամյան ալիքը: Գնում ենք, որ հարցնենք թելեգրամյան ալիքին, և պարզվում է, որ տվյալ ալիքը ոչինչ՝ հասցե հեռախոսահամար, չունի. այսինքն՝ չկա սուբյեկտ, որը պատասխանատվություն է ստանձնում լուրի համար:
Կոնջորյանի խոսքով՝ պետք է հնարավոր լինի նույնականացնել լուրի պատասխանատուին:
«Յուրաքանչյուր լուրի հետևում պիտի կանգնած լինի սուբյեկտ, որից կարելի կլինի դատել, թե տվյալ լուրը որտեղից է իրենց մոտ հայտնվել և այդ սուբյեկտը պիտի պատասխանատվություն կրի դրա համար: Այս օրենքի նախագծով արգելվում է, որ այդ լրատվամիջոցը հղում կատարի և սենսացիա գրի»,- նշեց քննարկման բանախոսը:
«Քաղաքացին իրավունք ունի իմանալ, թե ով է այն աղբյուրը, որը տալիս է տեղեկատվություն չափազանց կարևոր հարցերի վերաբերյալ: Երբ որ քաղաքացին ստանում է տեղեկատվություն մի լրատվամիջոցից, որը չի ցանկանում բացահայտել իր աղբյուրը, ապա դա տեղավորվում է օրենսդրության տրամաբանության մեջ, բայց եթե որևէ թելեգրամյան ալիք, որի հետևում թաքնված մարդը կարող է հարևան երկրներից մեկի որևէ սրճարանում, ոտքը ոտքին գցած, հայերենով ինֆորմացիա գեներացնել, և մենք Հայատանում դարձնենք նրան գլխավոր նյուզմեյքեր ու թույլ տանք, որ նա հանրային նարատիվներ ձևավորի, ապա մենք, որպես օրենսդիր մարմնի ներկայացուցիչներ, այստեղ խնդիր ենք տեսնում: Կոնջորյանը հավելեց, որ առաջարկվող նախագիծը մամուլի ազատության նկատմամբ ոտնձգություն չի նախատեսում:
Մանրամասները՝ տեսանյութում
