Հայ լեռնագնացների միությունն իր առջև խնդիր էր դրել մինչև զբոսաշրջային շրջանի սկիզբն ավարտել Հայաստանի առավել հայտնի 40 արշավային արահետների գծանշումները: Այս պահին ավարտվել է 30-ի գծանշումը:
Դրանք տեղադրվում են այն վայրերում, որտեղ կա մոլորվելու հնարավորություն: Այս առիթով հունիսի 8-10-ը լեռնագնաց, արշավորդ Թելմա Ալթուն Ղազարյանը վազել է Վարդենիսից դեպի Հադրութ (ավելի քան 283 կմ)` «Հայ լեռնագնացների միություն-Հայաստան» հասարակական կազմակերպության համար դրամահավաք անելու նպատակով:
«Մեր նպատակն արահետները սարքելն ու էկոզբոսաշրջությունը զարգացնելն է»,-լրագրողների հետ հանդիպման ժամանակ ասաց Թելման՝ ընդգծելով, որ ուրախ էր նաև իր հայրենակիցներին բոլոր ճանապարհներին տեսնելու համար, չնայած իրենց մեծ ցավ է պատճառել նրանց ապրելակերպը.
«Ես տեսա, թե որքան բարդ պայմաններում են ապրում մարդիկ ու դա հուզեց ինձ: Հանդիպեցի երեխաների, որոնց հեծանիվը սարքին չէր: Հարցրի՝ հայրիկը չի՞ կարողանում սարքել, ասացին՝ նա զինվորական է եղել, թշնամու գնդակից է զոհվել: Ցավալի է շատ»,-նշեց Թելմա Ալթուն Ղազարյանը:
Շարունակելով վերջինին՝ «Հայ լեռնագնացների միություն-Լոս Անջելես»-ի գլխամասի համահիմնադիր Ռոբերտ Ասսարյանը նշեց.
«Հայաստանում, Արցախում ցանկանում ենք զարգացնել էկոտուրիզմը: Մենք ներկայացնում ենք Լոս Անջելեսի լեռնագնացների խումբը: Ով ցանկություն ունի՝ կարող է մեզ միանալ, միակ պայմանը հայկական մշակույթի նկատմամբ համակրանք ունենալն է»:
Անի Կարապետյան
