ԱԱԾ նախկին տնօրեն Արթուր Վանեցյանին երեկ հրավիրել են Քննչական կոմիտե՝ հարցաքննության։
Այս լուրը հաստատել է ՔԿ մամուլի խոսնակ Նաիրա Հարությունյանը։
«Արթուր Վանեցյանը հարցաքննվել է երեկ՝ 2 գործով, մեկը գաղտնալսման գործն է, որպես վկա է հարցաքննվել։ Այդ քրեական գործի շրջանակներում նաեւ զննության է ենթարկվել Արթուր Վանեցյանի բջջային հեռախոսը, մյուս գործը ՀՖՖ-ում առերևույթ չարաշահումների վերաբերյալ քննվող քրեական գործն է, որտեղ հարցաքննվել է վկայի կարգավիճակով »,- ասել է Նաիրա Հարությունյանը։
Հիշեցնենք, որ ավելի վաղ հայտնել էինք, որ ԱԱԾ նախկին տնօրենի եւ ՀՔԾ պետի գաղտնալսման գործով հարցաքննվել են Արթուր Վանեցյանն ու ՀՔԾ պետ Սասուն Խաչատրյանը:
Հիշեցնենք նաև, որ հունվարի 15-ին, Նիկոլ Փաշինյանը կանչվել էր Քննչական կոմիտե հարցաքննության։
Նա հարցաքննվել էր ՀՀ ՀՔԾ պետ Սասուն Խաչատրյանի եւ ՀՀ ԱԱԾ նախկին տնօրեն Արթուր Վանեցյանի հեռախոսային խոսակցությունների գաղտնալսումների քրեական գործով։
