Չեմպիոնների լիգայի կիսաեզրափակչի երկրորդ խաղում Լոնդոնի Չելսին սեփական հարկի տակ հյուրընկալել էր Մադրիդի Ատլետիկոյին:
Նախորդ խաղում թիմերը ցուցադրեցին կիսաեզրափակչին ոչ վայել ֆուտբոլ, սակայն այսօր իսկական թրիլլեր էր Սթեմֆորդ Բրիջում:
Արագ, տեմպային ֆուտբոլ, լեցուն գոլային պահերով և գոլերով: Առաջինը հաջողության հասան լոնդոնյան ակումբի ֆուտբոլիստները, 36-րդ րոպեին Սեզաև Ասպիլիկուետայի փոխանցումից հետո աչքի ընկավ Ֆերնանդո Տորեսը: Սակայն մինչ ընդմիջման գնալը հյուրերին հաջողվեց հավասարեցնել հաշիվը, խաղակեսի ավարտից մեկ րոպե առաջ գոլի հեղինակ դարձավ Ադրիանը:
Սա լրացուցիչ խթան հանդիսացավ մադրիդցիների համար, ովքեր երկրորդ խաղակեսն անցկացրեցին բարձր կարգի ֆուտբոլ ցուցադրելով: Պետք է ընդգծել նաև Դիեգո Սիմեոնեյի հիանալի մարտավարություններն ու փոփոխությունները, որն էլ տվեց իր պտուղները: 60-րդ րոպեին փոխարինման դուրս ելած Սամուել Էտո՛Օ-ն սեփական տուգանային հրապարակում խախտեց խաղի կանոնները Դիեգո Կոստայի նկատմամբ, իսկ մրցավար Նիկոլա Ռիցոլին նշանակեց 11մ հարված: Գնդակին մոտենալով Կոստան սկսեց դժգոհել խաղադաշտից, որի պատճառով արժանացավ դեղին քարտի, սակայն դրանից հետո հիանալի հարվածով առաջ մղեց իր թիմին՝ ոչ մի շանս չթողնելով Մարկ Շվարցերին: Հանդիպման վերջակետն էլ դրեց Արդա Թուրանը՝ 72-րդ րոպեին հեղինակած գոլի շնորհիվ:
Հավելենք, որ Չեմպիոնների լիգայի եզրափակիչում, որը տեղի կունենա Լիսաբոնում, իրար դեմ կմրցեն Մադրիդյան Ատլետիկոն և Ռեալը, ով երեկ կատարյալ ֆիասկոյի ենթարկեց Մյունխենի Բավարիային (0-4):
