Երեկ, ըստ նախնական վարկածի, ինքնասպան էր եղել «Բոնուս» սուպերմարկետների ցանցի հիմնադիր տնօրեն Անդրանիկ Մուրադյանը։ ՀՀ քննչական կոմիտեն հայտնել էր, որ դեպքի առթիվ նախաձեռնվել է քրեական վարույթ՝ Քրեական օրենսգրքի 162-րդ հոդվածի 1-ին մասով (ինքնասպանության հասցնելը)։ Նշանակվել է դիակի դատաբժշկական փորձաքննություն։
«Արմլուր»-ը գրում է, որ կայքի հետ զրույցում, ըստ նախնական վարկածի ինքնասպան եղած «Բոնուս» սուպերմարկետների ցանցի հիմնադիր տնօրեն Անդրանիկ Մուրադյանի աներձագը՝ Արշավիր Հարությունյանը, որը «Բոնուս» սուպերմարկետների ցանցի հիմնադիրներից մեկն է, մանրամասներ է պատմում, թե ինչ է կատարվում իրենց բիզնեսի շուրջ։
Վերջինս զրույցում կոնկրետ տալիս է անուններ, թե ինչ իրավիճակի են կոնկրետ անձինք հասցրել իրենց։
Մասնավորապես, «Բոնուս» սուպերմարկետների ցանցի հիմնադիրներից Արշավիր Հարությունյանը նշում է «Սպայկա» ընկերության հիմնադիր Դավիթ Ղազարյանի և ՔՊ-ի սրտի գործարար Նարեկ Նալբանդյանի անունները ու հայտարարում․ «Կանգնեցրեք նրանց, 7 ամիս է՝ դժոխքի մեջ ենք, շանտաժով բիզնես են խլում»։
Վարչապետին անձամբ նամակ եմ գրել, հայտնել եմ, թե ինչեր են անում, ՀՀ վարչապետ Նիկոլ Փաշինյանը անձամբ արձագանքել է իմ նամակին։ Մանրամասները՝ հեռախոսազրույցում։
Այս պատմության առնչությամբ կայքը փորձեց կապ հաստատել «88» սուպերմարկետների ցանցի սեփականատեր Նարեկ Նալբանդյանի հետ։ Վերջինս, ի պատասխան մեր հարցումների, նշել է, որ ներկայացված պնդումները «զավեշտ են»։Փորձեցինք կապ հաստատել նաև «Սպայկա» ընկերության սեփականատերերից Դավիթ Ղազարյանի հետ։
Սակայն բոլոր փորձերը՝ նրա հետ կապ հաստատելու և մեկնաբանություն ստանալու ուղղությամբ, առայժմ արդյունք չեն տվել։
Հիշեցնենք, որ Անդրանիկ Մուրադյանի մահվան փաստով նախաձեռնվել է քրեական վարույթ՝ ինքնասպանության հասցնելու հոդվածով։ Քննչական կոմիտեն նշանակել է դատաբժշկական փորձաքննություն, իսկ դեպքի բոլոր հանգամանքները պարզվում են։
