ԱԺ-ն արտահերթության կարգով քննարկում էր ՀՅԴ խմբակցության նախաձեռնությունը՝ փոփոխություններ կատարել ՀՀ «Ընտրական օրենսգրքում» և անցում կատարել 100 տոկոս համամասնական ընտրակարգի։
ՀՀԿ պատգամավոր Մանվել Բադեյանը ասաց, թե ընդդիմությունը ինչպես միշտ առաջարկում է ազգը փրկելու գաղափարներ, այն է` մեծամասնական ընտրակարգից հրաժարվելը և իշխանական համակարգը հիմնելը` կուսակցական գաղափարախոսական հենքի վրա:
«Ցույց տվեք ինձ այդ կուսակցությունները, բացի ՀՀԿ-ից: Հիմա հիշեք, թե ընտրություններից առաջ ինչպես եք կազմում այդ ցուցակները: Ավելի կոռումպացված համակարգ դուք երբևէ տեսե՞լ եք: Մեղադրում եք բիզնեսմեններին, ովքեր եկել են ԱԺ, իբր թե պաշտպանելու իրենց բիզնեսը: Բայց օրինակ, ինձ հաջողվե՞լ է պաշտպանել իմ բիզնեսը: Երբեք: Մինչդեռ, իրենց քաղաքական ուժ հռչակողները քաղաքականությունն են բիզնես սարքել ու շատ էլ լավ բարգավաճում են»:
ԱԺ փոխնախագահ Էդուարդ Շարմազանովը շնորհակալություն հայտնեց իր կուսակցին` պարոն Բադեյանին` ազնիվ ու անկեղծ ելույթի համար:
