Լոզանի սպորտի վերաքննիչ դատարանը մասնակի բավարարել է ՈՒԵՖԱ-ի նախագահ Միշել Պլատինիի հայցը:
Ինչպես տեղեկացնում են լրատվամիջոցները, դատարանը նրա վեց տարվա որակազրկումը նվազեցրել է չորսի: Բացի այդ, 60-ամյա չինովնիկը կվճարի 60 հազար ֆրանկ տուգանք՝ 80 հազարի փոխարեն:
Սակայն դատարանի որոշումը չի գոհացրել Միշել Պլատինիին, որը հույս ուներ, որ իր վրայից կհանեն որակազրկումը եւ ինքը կշարունակի գլխավորել ՈՒԵՖԱ-ն: Այժմ նա ստիպված է հրաժարական տալ: Դա տեղի կունենա ՈՒԵՖԱ-ի առաջիկա համաժողովում՝ մայիսի 18-ին:
Հիշեցնենք, որ Միշել Պլատինին անցած տարվա հոկտեմբերին ՖԻՖԱ-ի որոշմամբ վեց տարով հեռացվել էր ֆուտբոլից, քանի որ չէր կարողացել ապացուցել ֆուտբոլի միջազգային ֆեդերացիայի նախագահ Զեպ Բլատերից ստացած 2 մլն ֆրանկի օրինականությունը:
