Համացանցում տարածված հիստերիան, թե իբր այս օրերին Արցախում գտնվող Շուշան Պետրոսյանը ադրբեջանցիների ջրաղացին ջուր է լցնում , քանի որ իբր ֆեյսբուքյան իր էջում տեղադրել է լուսանկար ու գրել`«Ստեփանակերտի մոտ, Խանքենդիում»`առվազն անգրագիտության, չարության ու նաև անթաքույց ստորության արդյունք է:
Չարախնդողների տեղեկացնենք, որ , ցավոք, քչերը գիտեն, որ Արցախ այցելելու ժամանակ արված բոլոր նկարները, որ հայտնվում են Ֆեյսբուք սոցցանցում, մի քանի վայրկյան անց Ֆեյսբուքը ներառում է Azerbaijan էջում:
Պատճառը հետևյալն է. քանզի Ֆեյսբուքն օգտագործում է Մայքրոսոֆթին պատկանող Բինգ (Bing.com) ծառայության քարտեզը, որում Արցախը նշված է որպես Ադրբեջանի մաս, իսկ Ստեփանակերտը՝ որպես «Խանքենդի», ապա ավտոմատ կերպով նշվում է «Ադրբեջան»: Նույն խնդիրն է, երբ լուսանկարի նկարահանման վայրը tag է արվում Ստեփանակերտով, այդ լուսանկարները դառնում են «Խանքենդի»-ում նկարված. լուսանկարի վայրը անգամ ոչ թե «Ղարաբաղ», այլ «Արցախ» նշված բոլոր նկարները տեղ են գտնում Ադրբեջան երկրի ֆեյսբուքյան էջում:
Սա ոմանց բարձրացրած աղմուկի պատասխանի տեսական մասը, իսկ բարոյական մասի մասին ասեմ հետևյալը:
Շուշան Պետրոսյանը, ով Հայաստան-Ավստրալիա պատգամավորական խմբի նախագահն է, այս օրերին Արցախում է ավստրալացի պատգամավորների ընկերակցությամբ, որոնց հետ էլ քիչ հետո հանդիպելու է ԼՂՀ նախագահ Բակո Սահակյանին: Իսկ Արցախ այցելությունն ու ղարաբաղյան խնդրի հետ ավստրալացի պատգամավորների տեղում ծանոթությունը, չեմ կարծում, թե որևէ մեկը կասկածում է, որ կարող է օգտակար լինել Ավստրալիայում հայկական հարցերի առավել օբյեկտիվ ներկայացման առումով:
Բացի այդ, Շուշան Պետրոսյանն իր միջոցներով Արցախ է տարել ու Մարտակերտի ուսումանկան հաստատություններին է հանձնելու նկարչական մոլբերտներ, թղթեր, ներկեր, yamaha մակնիշի երաժշտական կենտրոն, քիմիական լաբարատորիաների համար նախատեսված սարքեր, մարզական պարագաներ դպրոցական պայուսակներ, հագուստ...
Եվ այս ամենը նաև անում է առանց բարձրաձայնելու և գուցե նեղվի, եթե իմանա` այս մասին գրել ենք իր հետ չհամաձայնեցնելով` ուղակի տեղյակ լինելով , ինչպես նաև իմանալով, որ վերջին երեք ամսվա ընթացքում նա տասնհինգ անգամ այցելել է Արցախ:
Դե հիմա ասեք` ով է ադրբեջանցիների ջրաղացին ջուր լցնում ու ինչու են ոմանք նման հիստերիա բարձրացնում Արցախ` ավստրալացի պատգամավորների ուղեկցությամբ այցելած ու Մարտակերտի ուսումնական հաստատություններին օգնող Շուշան Պետրոսյանի դեմ:
Հեղինակ` Անահիտ Հարությունյան
