Ռուսաստանի Առաջին ալիքի գործադիր տնօրեն Կոնստանտին Էռնստը փորձել է ինքնասպանություն գործել. ըստ lenta-ua.net-ի` ապրիլի 30-ին նա երկար հեռախոսազրույց է ունեցել «Գազպրոմ» ընկերության նախագահ Ալեքսեյ Միլլերի և ՌԴ նախագահ Վլ.Պուտինի հետ, որից հետո տուն է մտել անհանգիստ վիճակում ու փակվել է իր գրասենյակում: Ավելի ուշ` նրա ընկերուհին կրակոցի ձայն է լսել: Էռնստին անգիտակից վիճակում և պարանոցի շրջանում հրազենային վնասվածքով տեղափոխել են հիվանդանոց:
Հիշեցնենք, որ Ռուսաստանի Առաջին ալիքի գործադիր տնօրենը հայտարարել էր, որ ինքը բիզնեսմեն և քաղաքական գործիչ Սերգեյ Լիսովսկուն չի մեղադրել հեռուստալրագրող Վլադիսլավ Լիստևի սպանության պատվիրատու լինելու մեջ: Չնայած, ավելի վաղ, առանց նրա համաձայնության հարցազրույց է հրապարակվել, որտեղ նա հայտարարել է, որ ОРТ հեռուստակայանի գլխավոր տնօրեն Վլադիսլավ Լիստևի սպանության պատվիրատուն եղել է գովազդային մագնատ Սերգեյ Լիսովսկին:
ОРТ գլխավոր տնօրեն Վլադ Լիստևը (նրա տեղը հետագայում զբաղեցրեց Կոնստանտին Էռնստը) սպանվել էր 1995թ.-ի մարտի 1-ին՝ իր տան շքամուտքում։
Մինչ այժմ սպանությունը չի բացահայտվել։ Անցյալ տարի, սակայն, նրա սպանության գործը կապվել էր ռուս օլիգարխ Բորիս Բերեզովսկու անվան հետ։
Նշենք, որ ավելի ուշ` Ռուսաստանի Առաջին ալիքի գործադիր տնօրեն Կոնստանտին Էռնստը, մեկնաբանելով իր «ինքնասպանության» մասին տարածված լուրերը` Новая Газета-ի հետ զրույցում` ասել է.
«Նրանք մտածում են, թե ես նորմալ կրակել չե՞մ կարող»: Նման հայտարարությամբ Կոնստանտին Էռնստը հանդես է եկել նաև իր կայքում:
