ԱԺ-ում այսօր ՔՊ-ական պատգամավորներն իրենց ելույթներում ընդդիմությանը քննադատելուց զատ, կրկին անգամ թիրախավորեցին Դաշնակցությանն ու դաշնակցականներին։
Ընդդիմադիր պատգամավոր Արթուր Խաչատրյանը իրենց հասցեին հնչած մեղադրանքները դեմագոգիա անվանեց։ Նա խոսքն ուղղելով ՔՊ-ական պատգամավոր Հովիկ Աղազարյանին՝ ասաց․ «Քո գլխին են սարքում, այ ընկե՛ր, ձեռի հետ էլ` մեր։ Վաղը, երբ էս կառավարությունը ձախողի, ասելու են` էս կառավարության ձախողման մեջ մեղավոր է Հովիկ Աղազարյանը` որպես նախկին դաշնակցական»։

«Փորձում էի հասկանալ՝ որտեղից է գալիս մեր դաշնակցական գործընկերների ֆետիշը պետական պաշտոնյաների թիկնապահների վերաբերյալ, և ինձ թվում է՝ ես հասկացա»,- Աժ-ում 2025 թվականի պետբյուջեի նախագծի քննարկման ժամանակ ասաց ԱԺ փոխխոսնակ Ռուբեն Ռուբինյանը․ «1996 թվականին, երբ առաջին անգամ ներխուժում տեղի ունեցավ ԱԺ, ծեծի և բռնության ենթարկվեցին ԱԺ նախագահն ու նախագահի տեղակալը, Դաշնակցությունը ակտիվ ներգրավվածություն ուներ այդ գործընթացում:

1999 թվականին, երբ արդեն երկրորդ անգամ զինված ներխուժում տեղի ունեցավ ԱԺ, և սպանվեցին ԱԺ նախագահը, երկու տեղակալները, վարչապետը, այլ պաշտոնյաներ, տեռորիստական խմբի ղեկավարը նախկին դաշնակցական էր: Կարծում եմ՝ Աղվան Վարդանյանը կվկայի, որ դաշնակցականը նախկին չի լինում:

2018 թվականին, երբ երրորդ անգամ տեղի ունեցավ ներխուժում ԱԺ, և մահափորձ տեղի ունեցավ ԱԺ նախագահ Արարատ Միրզոյանի նկատմամբ, նույն պահին դաշնակցության ներկայացուցիչներից մեկը գրոհում էր «Ազատություն» ռադիոկայանի գրասենյակը, և էլ չեմ ասում՝ որքան դաշնակցականներ էին ներգրավված այդ անկարգությունների ժամանակ: Սրանք ակնհայտ և անհերքելի փաստեր են: Ես կարող եմ ենթադրել միայն մի բան, որ մեր դաշնակցական գործընկերները բողոքում են, որ պետական պաշտոնյաներն ունեն թիկնապահներ, որոնք, ի դեպ, իրենց ընտրությամբ չէ, որ ունեն, հատուկ պահպանվող անձինք են՝ վարչապետ, ԱԺ նախագահ և այլն, իրենք բողոքում են, որովհետև ուզում են, որ հաջորդ մահափորձն ավելի հեշտ իրականացնեն կամ իրականացնեն, միակ տրամաբանական բացատրությունը սա է:

Բայց միևնույն ժամանակ մեր դաշնակցական գործընկերները պարադոքսալ կերպով չեն բողոքում, որ Ռոբերտ Քոչարյանը թիկնապահ ունի, հիմա էլ ունի:

Ինչո՞ւ, սիրելի գործընկերներ, չեք գնում, ձեր քաղաքական ուժի ղեկավարին ասում՝ պարոն Քոչարյան, փորձը ցույց է տալիս, որ երբ դուք թիկնապահ ունեք, մեկ-մեկ դաշնակցականներ են սպանվում, եկեք դուք ամեն դեպքում մի ունեցեք թիկնապահ, մարդ ես, կարող է մեկիս տա, «անդազահան» անի։ Մեր ժամանակ ոչ մի պետական պաշտոնյայի թիկանպահ չի սպանել որևէ դաշնակցականի, ձեր ժամանակ պետական պաշտոնյայի թիկնապահ սպանել է առնվազն մեկ դաշնակցականի»,- ասաց Ռուբինյանը։