Ռուբեն Ալեքսանյանը բրոնզե մեդալ նվաճեց ծանրամարտի Եվրոպայի 2019 թ. առաջնությունում: Բաթումիում ավարտված մրցաշարի +109 կգ քաշային կարգի պայքարում նա 3-րդ տեղը զբաղեցրեց երկամարտի 440 կգ-ով:  Ռուբենը պոկում վարժությունում 5-րդն էր (195 կգ), հրումում փոքր արծաթ նվաճեց (245 կգ):

Այս քաշային կարգում էր նաեւ օլիմպիական, աշխարհի ու Եվրոպայի փոխչեմպիոն Գոռ Մինասյանը: Նա 5-րդ տեղը զբաղեցրեց (422 կգ): Պոկում վարժությունում նա փոքր բրոնզ նվաճեց 200 կգ-ով: Հրում վարժության նրա 2-րդ մոտեցումը չստացվեց, 3-րդից չկատարեց վնասվածքի պատճառով:

Չեմպիոն դարձավ անվիճելի առաջատար, օլիմպիական չեմպիոն վրացի Լաշա Տալախաձեն` երկամարտի 478 կգ-ով:

Հիշեցնենք, որ այսօր երկամարտի 427 կգ արդյունքով 109 կգ քաշային Սիմոն Մարտիրոսյանը նվաճեց Եվրոպայի չեմպիոնի կոչումը, իսկ 102 կգ քաշային Սամվել Գասպարյանը 377կգ արդյունքով նվաճեց Եվրոպայի առաջնության արծաթե մեդալ: