ASEKOSE.am-ը նամակ է ստացել գյումրեցի ընթերցողներից մեկի կողմից, որտեղ հեղինակն անդրադառնում է Գյումրիի քաղաքապետարանի մի խումբ աշխատակիցների աշխատավարձերի նվազմանը և այլ հարցերի: Խնդիրը միակողմանի չներկայացնելու նկատառումներից ելնելով` ASEKOSE.am-ի թղթակիցը նշված նամակներում արծարծվող խնդիրների վերաբերյալ պարզաբանում է խնդրել Գյումրիի քաղաքապետի մամուլի խոսնակ Զոհրաբ Եգանյանից: Հոդվածները և պատասխանը ներկայացնում ենք ստորև.
Փողերը գողացել են միջոցառման ժամանա՞կ
Հունիսի 21-ին Գյումրիում կայացել է երաժշտական դպրոցների հաշվետու ավանդական համերգը: Համերգի ընթացքում ելույթ են ունեցել քաղաքի երաժշտական դպրոցների սաները, ներդպրոցական նվագախմբերն ու երգչախմբերը:
Ավանդույթի համաձայն` դրամական պարգևների են արժանացել լավագույն դպրոցները, դասատուներն ու տնօրենները:
Ինչպես պատմում են մեր աղբյուրները, որպես պարգևավճար Գյումրու քաղաքապետարանը յուրաքանչյուրին 20.000 դրամ պետք է նվիրեր, սակայն «լավագույններին» հանձնվել է 10.000 դրամ:
Գյումրու քաղաքապետարանի մշակույթի բաժնի պետը գումարները հանձնելու պահին ստացողների ականջին շշնջացել է, որ գումարի կեսը գողացվել է թատրոնի բեմի ետում և խնդրել է աղմուկ չբարձրացնել:
Այս փաստն, անշուշտ, ծաղրի առիթ դարձել, քանզի , ինչպես նշում են գյումրեցիները, «էդ ի՞նչ ատչայանի» գող է եղել, որ գումարի հալալ կեսն է տարել` չհաջողացնելով տանել այն ամբողջությամբ:
Մարդիկ զայրացած նշել են, որ սա անամոթություն է և քաղաքապետարանի պաշտոնյանները «ֆինտ» են արել ` հայտնել են պարգևի մի գումար, իսկ իրականում պատրաստել են մեկ այլ չափի գումար:
Ինչպես ասում են, քաղաքապետարանը լավը երևալու համար էժան PR է անում,մինչդեռ մոռացվում է, որ գործ ունեն ողջ ու առողջ, լեզու ու բերան ունեցող մարդկանց հետ:
Ինչու՞ են ներվում Գյումրու քաղաքապետ Սամվել Բալասանյանի կամայականությունները
Տևական ժամանակ է, որ մենք ահազանգեր ենք ստանում այն մասին, որ Գյումրու քաղաքապետ Սամվել Բալասանյանի որոշմամբ իջեցվել է քաղաքապետարանի մի խումբ աշխատակիցների աշխատավարձը` 70.000 դրամից 35.000 դրամ, մանկապարտեզների տնօրեններինը`80.000-ից հասցվել է 60.000-դրամի, ինչպես նաև շեշտակի նվազել և դարձել է 22.000 դրամ հաշվապահների աշխատավարձը:
Գյումրու քաղաքապետարանի աշխատակիցների խումբը նշում է, թե այս ամենը քաղաքապետի կամայականությունն է:Նրանք հարցնում են, թե ինչու ֆինանսական վերահսկողական մարմինները չեն զբաղվում սրանով, ով է տեսել, որ աշխատավարձ իջեցվի, այն դեպքում, երբ երկրի նախագահը նշում է, թե պետք է աշխատավարձի բարձրացում լինի:
Բողոքավորները նշում են նաև, որ աշխատավարձի իջեցումը Բալասանյանն իրականացնում է ընտրովի` ըստ իր տրամադրության ու տրամադրվածության:
«Սա ապօրինի գործողություն է և Վերահսկիչ պալատը պետք է արագ արձագանքի Գյումրու մի քանի ամսվա քաղաքապետի գործողություններին»-մեզ հետ զրույցում նշում էին քաղաքապետարանի զայրացած աշխատակիցները` չցանկանալով, որ հրապարակվեն իրենց անունները: Վերջիններս դեռ շարունակում են աշխատել Գյումրոււ քաղաքապետարանում և անգամ 35.000 դրամը պետք է կարողանան ծառայեցնել դեղորայք ու ցամաք հաց գնելուն:
Ամիսներ առաջ ԱԺ ՀՀԿ-ական պատգամավոր Մկրտիչ Մինասյանը իրեն ուղղված հարցին պատասխանել էր. «35.000 դրամով ապրելը շատ դժվար է, բայց եթե ստիպված լինեմ, կփորձեմ ապրել: Իմը մի քիչ ուրիշ է, չեմ ծխում, չեմ խմում, պրակտիկորեն մսեղեն չեմ օգտագործում»: Սա վերցված է Լևոն Տեր-Պետրոսյանի «ըմբռնումով մոտենալու» և սեփական ժողովրդին ծաղրելու ժամանակակից բառապաշարից: Պատգամավորի այս արտահայտությունը ֆեյսբուքյան մեծ աղմուկ առաջացրեց, բլոգերները նշում էին, որ մարդը պետք է ք-քով / բառը տպարության ենթակա չէ/ սնվի, որ 35.000 դրամը բավականացնի:
Ահա, Սամվել Բալսանյանն էլ, անսալով Մկրտիչ Մինասյանին, գործի է դնում մարդկանց 35.000 դրամով «չոքցնելու» բանաձևը:
Մեզ հասած տեղեկությունների համաձայն, Սամվել Բալասանյանի ընտանիքին պատկանող «Սև Բերդ» համալիրի տարածքում աշխատող քաղաքապետարանին պատկանող տեխնիկայի`կռունկի և բեռնատարի վարոդները` Կորյուն Ավետիսյանն ու Էդգար Եղիազարյանը, վիճել են քաղաքապետի հետ, ով հերթական անգամ փորձել է գործի դնել «չոքցնելու» իր մեթոդը `չվճարելով օրեր շարունակ իր սեփական օբյեկտի վրա աշխատող կռունկավարին ու բեռնատարի վարորդին: Վերջիններիս ասվել է. «դուրերդ չի գա, դիմում գրեք գնացեք, թե չէ, վրեքդ գործ հարուցել կտամ»: Քաղաքապետարանի աշխատողները, ովքեր հարկադրաբար, «գործի բերումով» Բալասանյանի մասնավոր օբյեկտի վրա են գործ են արել, դիմումները գրել և հեռացել են:
Չվճարելն ու «գցելը» դարձել է Գյումրու քաղաքապետի աշխատաոճը: Բայց , ինչու է այս ապօրինությունները հանդուրժվում , սա է հարցը: Թեև ասում են` Բալասանյանը միշտ կրկնում է, որ ՀՀ Նախագահն ու Ծառունկյանն իմ կռնակիս են, իմ դեմ խաղ չկա»:
Նշված խնդիրների վերաբերյալ ASEKOSE.am-ի թղթակիցը մեկնաբանություն է խնդրել Գյումրու քաղաքապետի մամուլի խոսնակ Զոհրաբ Եգանյանից, ով պատասխանել է.
«Այդ տեղեկատվությունը ձեզ տրամադրողին խորհուրդ կտամ հանգստանալ, լիցքաթափվել, հանգիստ հետևել քաղաքի զարգացմանը: Մենք ոչ մի անօրինականություն թույլ չենք տա: Միգուցե նման տեղեկատվությունը ձեզ փոխանցողները սովոր չեն, որ հնարավոր է աշխատել օրեքի շրջանակներում. մեզ մոտ դա այդպես է: Ընդհանրապես ինչ կատարվում է` աշխատավարձերի ցանկացած փոփոխություն, այդ թվում` և ավեացումը, լինում է օրենքի շրջանակներում, ավագանու որոշմամբ, այսինքն` իրավական ակտերով: Թատրոնում նվերներ հանձնելու մասին լուրը ևս ապատեղեկատվություն է: Նման բան չի եղել: Մարդկանց տվել են այնքան գումար, հաստատված է եղել նախապես: Ակախ նրանից` նման տեղեկություններ կտարածվեն, թե ոչ, միևնույն է` Գյումրին զարգանալու է: Չարակամ մարդկանց խնդրում ե` փորձեք օգնել, ոչ թե խանգարել»:
