Երեկ՝ հոկտեմբերի 22-ին, ՀՀ Տավուշի մարզի սահմանամերձ Այգեպար գյուղում՝ հակառակորդի դիրքերից ընդամենը մի քանի հարյուր մետր հեռավորության վրա, նորակառույց մատուռ է օրհնվել:
Կատարվել է օրհնության կարգ, մոմավառությունից հետո մատաղ է մատուցվել: Ապա միջոցառմանն ազգային երգ ու պարով շունչ են տվել Բերդի մշակույթի տան սաները և Նորաշենի պարի համույթը:
Այգեպարի գյուղապետ Անդրանիկ Այդինյանը ASEKOSE.am-ի թղթակցի հետ զրույցում տեղեկացրեց, որ մատուռը կառուցվել է ռուսաստանաբնակ այգեպարցիներ Ավագ և Բելլա Հովակիմյանների հովանավորությամբ: Իսկ ճարտարապետը Հրաչ Գրիգորյանն է՝ կրկին այգեպարցի:
Մատուռի օրհնության կարգը իրականացրել է Արգենտինայի թեմի առաջնորդը:
Սահմանամերձ Այգեպարը հիմնադրվել է 1937 թվականին՝ ծխախոտի ֆերմենտացիոն գործարանի հիման վրա: Դրանից հետո կառուցվել են գինու, ապա պահածոների գործարանները, օդանավակայանը դպրոցը:
Անդրանիկ Այդինյանի խոսքով՝ 80-ականներին այստեղ քարակերտ խաչի մասունք է հայտնաբերվել: Ապա հավատավոր ժողովուրդը սկսել է մոմ վառել մասունքի մոտ՝ այդ կերպ աղոթքը հասցնելով Աստծուն: Ավագ Հովակիմյանը դեռ պատանի ժամանակ խաչքար է փորագրել և տեղադրել այդ վայրում: 2011-ին Բերդ քաղաքի և տարածաշրջանի հոգևոր հովիվ Տեր Արամ քահան Միրզոյանի կողմից խաչքարն օրհնվել է: Իսկ 2013-ին Բելլա և Ավագ Հովակիմյանները կառուցել են մատուռը:
***
Հ.Գ. Այգեպարը և ադրբեջանական Ալիբեյլին միմյանցից մի քանի հարյուր մետր է բաժանում: Գյուղերն այնքան մոտ են, որ ադրբեջանցիների հարսանիքի ձայնը լսվում է Այգեպարում:
Զարմանալի զուգադիպությամբ սահմանամերձ Այգեպարի միջոցառումը ժամերով գրեթե համընկել է Պառավաքարի ճանապարհին տեղի ունեցած ցավալի միջադեպի հետ:
Բարեբախտաբար, այդ պահին Այգեպարի ուղղությամբ կրակոցներ չեն հնչել, միջոցառումը, ազգային երգն ու պարը չեն դադարեցվել, թեպետ զգուշավորությունն այստեղ կենսակերպ է: Անդրանիկ Այդինյանի խոսքով՝
«Մատուռը գյուղից մի փոքր հեռու՝ դեպի Բերդ տանող ճանապարհի վրա է՝ ծառաշատ վայրում: Մարդկանց ուղորդել ենք դեպի ծառերը, որ բաց տարածության մեջ չկանգնեն և տեսանելի չլինեն հակառակորդի կողմից»:
Այգեպարցին այսօր ամուր է կանգնած իր հողին, այսուհետ ևս ամուր է կանգնելու...վկան՝ նորակառույց և արդեն օրհնված մատուռը:
Անդրանիկ Այդինյանն ասում է, որ բնակիչների համար կարևոր նշանակություն ունի մատուռը.
«Հույս ու հավատ է ներշնչում, որ Աստված պահապան է: Մենք խաղաղասեր մարդիկ ենք, մենք պատերազմ չենք ուզում»:
Հեղինակ՝ Հասմիկ Գյոզալյան
