Երեկ` մայիսի 28-ին, Հանրապետության հրապարակում կայացավ Հայաստանի Հանրապետության և Մայիսյան հերոսամարտերի 100-ամյակին նվիրված տոնական համերգը, որին բացի պաշտոնատար և բարձրաստիճան հյուրերից, հրավիրված էին մի շարք հայտնի երգիչ-երգչուհիներ: Սիրուշո, Սևակ Խանաղյան, Ռազմիկ Ամյան, Գոռ Սուջյան, Արտո Թունջբոյաջյան, Ներսիկ Իսպիրյան, Կամո Սեյրանյան… Ահա այն արտիստները, ովքեր ելույթ ունեցան համերգի ընթացքում:
Պարզվում է, սակայն, որ կազմակերպիչների ոչ ճիշտ աշխատանքի շնորհիվ եղել են նաև արտիստներ, որոնց ելույթները սահմանվածի պես չեն կայացել: Նրանցից են Սոնա Շահգելդյանը, Գաբի Գալոյանը, Սրբուհի Սարգսյանը, «Նեմրա» խումբը և այլք:
Asekose.am-ը կապ հաստատեց Գաբի Գալոյանի հետ՝ ճշտելու՝ իրականում ի՞նչ է տեղի ունեցել, և թե ինչո՞ւ չի կայացել նրա ելույթը:
«Իմ ելույթը նախատեսված էր 22:30-ին, իսկ Սոնա Շահգելդյանինը՝ 22:50-ին, ում ելույթով էլ պետք է եզրափակվեր համերգը: Բացի նրանից, որ իմ ելույթի սահմանված ժամից արդեն բավական ժամանակ էր անցել, ինձ մոտեցան և ասացին, որ հաղորդավար չկա, ինչից ելնելով՝ ինքս ինձ պետք է հայտարարեմ և բեմ բարձրանամ: Այդ պատճառով ես պարզապես հրաժարվեցի ելույթ ունենալուց՝ նշելով, որ նման վերաբերմունքն ուղղակի անարգանք է երգչի հանդեպ»,- պատմեց Գաբին:
Վերջինս նշեց, որ ընդհանրապես տեղյակ չէ, թե մինչ այդ ինչ է տեղի ունեցել, ավելին` կազմակերպիչները, ովքեր հրավիրել էին Գաբիին, որևէ մեկնաբանություն չեն տվել.
«Կազմակերպիչները ոչ ներողություն խնդրեցին ինձանից, ոչ էլ հեռախոսազանգերիս պատասխանեցին»,- տեղեկացրեց երգչուհին, ապա ավելացրեց.
«Չգիտեմ, թե մեզ հետ կապված որն էր խնդիրը, բայց եթե մեզ հրավիրել են, ապա պետք է պատշաճ կերպով նաև դիմավորեին և ճանապարհեին: Վերջին տարիներին համերգներով հիմնականում հանդես եմ գալիս արտերկրում և տեսնելով այնտեղի կազմակերպիչների պատասխանատվությունը՝ հասկանում եմ, որ այն, ինչ տեղի ունեցավ երեկ, պարզապես խեղկատակություն էր»,- ասաց Գաբի Գալոյանը:
«Ես վատ եմ զգում այն բանի համար, որ նախօրոք ֆեյսբուքյան իմ էջի միջոցով հայտարարել էի, որ պետք է ելույթ ունենամ, և կային մարդիկ, ովքեր այսօր ինձ գրել են, որ երեկ սպասել են ինձ, և ես նրանց հուսախաբ եմ արել: Միակ մտածմունքս դա է, թե չէ մեծ հաշվով ինքս թքած ունեմ կատարվածի վրա: Եթե նման միջոցառումները պետք է այսպես կազմակերպվեն, թող դրանք ընդհանրապես չլինեն: Եթե պետք է վիրավորեն երգչին, նա իրեն ստորացված և նվաստացած զգա, ապա ավելի լավ է սահմանափակվենք միայն շքերթով»,- մեզ հետ զրույցում նկատեց երգչուհին:
Հավելենք, որ երեկվա տոնական միջոցառումը կազմակերպված էր «Մեցցո» կազմակերպության կողմից:
Հիշեցնենք, որ ավելի վաղ երգչուհի Սոնա Շահգելդյանը նույնպես իր վրդովմունք էր հայտնել` համերգի վատ կազմակերպված լինելու և իր` ելույթ չունենալու վերաբերյալ:
Հեղինակ՝ Սաթենիկ Խաչատրյան
Կարդացեք նաև՝ Մի դեմք ունեցեք, բայց Ձերը, ոչ թե մի քանիսը և մեկը մյուսից քծնող. Սոնա Շահգելդյանը վրդովված է
Վախենում է, որ միայնակ կմնամ. Գաբի Գալոյանը՝ կյանքի մեծագույն կորստի, հարվածների և իր սիրո մասին
Չեմ ընտրել ինչ-որ մեկի սիրուհին լինելու և որևէ կնոջ ցավեցնելու ուղին. Գաբի Գալոյան
