«Nouvelles d'Arménie» ամսագիրը գրում է, որ Ֆրանսիական հանրային «France 2» հեռուստաալիքը դեկտեմբերի 17-ի նորությունների թողարկման ժամանակ հայաստանյան խոհանոցի առանձնահատկությունների մասին ռեպորտաժ է ցուցադրել: 
Ֆրանսիական նկարահանող խումբն այցելել է Սեւանի ափին բնակվող Մկրտչյանների ընտանիք, որը պատրաստվում է Ամանորին: Ընտանիքում ամեն մեկն իր հատուկ դերն ունի, պատմում են թղթակիցները:
«Մենք հայկական խոհանոցի գաղտնիքները սովորեցնում ենք մեր դուստրերին ու հարսներին: Նրանք կպահպանեն ավանդույթները, երբ մենք չլինենք»,-ասել է ընտանիքի մայրը:
Ռեպորտաժում նշվում է, որ Հայաստանում իդեալական է այն սեղանը, որտեղ տեղ չկա:
«Երբ երիտասարդ կանայք պատրաստվում են ամուսնանալ, նրանք պիտի սովորեն 60 տարբեր բաներ անել՝ սեղան գցել, ուտելիք պատրաստել, գործել եւ այլն»,-ասել է Արթիկ Մկրտչյանը: