Արդեն տեղեկացրել ենք այն մասին, որ օրերս Ղրիմում ավարտված մանկական «Նոր Ալիք» մրցույթից մեր մասնակիցը` Մերի Քոչարյանը, վերադարձել է 3-րդ հորիզոնականով: Այս առիթով Asekose.am-ի թղթակիցը զրուցեց Մերիի պրոդյուսերի` Գրիգոր Կյոկչյանի հետ` ճշտելու իրենց տպավորությունների, սպասելիքների, հանդիպած դժվարությունների և հետագա անելիքների մասին:
«Կարծում եմ, որ 3-րդ հորիզոնականը խրախուսող և ոգևորող մրցանակային հորիզոնական է հատկապես «Նոր Ալիք» մրցույթում, որը որ շատ բարձր որակավորում ունի մեր երկրում: Այս տարի այն բավական դրական, էմոցիոնալ և ոգևորող անցավ, որովհետև մինչև վերջին մասնակցի ելույթը պարզ չէր, թե ով է հաղթող դառնալու»,- իր տպավորություններով կիսվեց Գրիգոր Կյոկչյանը` հավելելով, որ այս տարվա մրցակցությունը բավական մեծ էր, քանի որ այս տարի մանկական «Նոր Ալիք» մրցույթի մասնակիցներից մի քանիսը հաջողություն էին ունեցել, անգամ նրանցից մեկը հաղթող էր ճանաչվել մանկական «Եվրատեսիլ»-ում:
Խոսելով նմանատիպ մրցույթների ժամանակ առաջ եկող դժվարությունների և երբեմն նաև անարդարությունների մասին` Մերի Քոչարյանի պրոդյուսերը շեշտեց, որ մասնակիցների գնահատականների առումով որևէ անարդարություն չի նկատել, ավելին, ինքն էլ իր հերթին իսկապես արժանի է համարում մրցանակային առաջին տեղը զբաղեցրած մասնակցի հաղթանակը.
«Այս տարի հաղթող ճանաչվեց Մալթայի ներկայացուցիչը, ով 2013թ-ին հաղթող էր ճանաչվել նաև «Մանկական Եվրատեսիլ»-ում: Այս աղջնակն իսկապես լավ էր երգում և արժանի էր հաղթանակին: Ի դեպ նշեմ` որ նրանից մենք ընդամենը երկու միավորով ենք հետ եղել,- ասաց Գրիգորը` ավելացնելով,- այս մրցույթում կարող է լինել սուբյեկտիվ գործոնը, բայց անարդարություն, կարծում եմ, որ չի կարող լինել: Պարզապես կային մասնակիցներ, ովքեր ցանկություն ունեին կատարելու այլ երգեր, բայց մրցույթի կազմակերպիչների կողմից նրանց դա թույլ չտրվեց: Բայց սա անարդարություն անվանել չենք կարող: «Նոր Ալիք»-ում կարևոր է շոուի գաղափարը: Այստեղ պետք էր գունավոր, վառ և մրցութային ելույթ ունենալ: Կարևոր չէ, թե ով կզբաղեցնի 1-ին հորիզոնականը, առաջնայինն այն է, որ բեմից հնչեցված երգերը լինեն մրցույթի պրոդյուսերների ճաշակով և մրցույթի ձևաչափին համապատասխան»,- շեշտեց Գրիգորը:
Ըստ նրա խոսքերի` մանկական «Նոր Ալիք»-ում բացի ձայնային տվյալներից կարևոր է նաև, որ մասնակիցը բեմական կեցվածք ունենա.
«Ինչպես «Եվրատեսիլ»-ում, այնպես էլ մանկական «Նոր Ալիք»-ում միայն ճիշտ պատրաստվելու արդյունքում մասնակիցը կարող է մրցանակային տեղ զբաղեցնել,- շարունակեց Գրիգորը` հավելելով, որ մեր մասնակից Մերին բազմաթիվ գովեստի խոսքերի է արժանացել` կապված իր բեմական կեցվածքի հետ.
«Ժյուրիի անդամներն ասացին, որ պարզապես զարմացած են Մերիի բեմական կեցվածքով և առաջին հերթին նրանք Մերիին գնահատել են որպես արտիստ, նոր հետո որպես երգչուհի, որովհետև մեր հայ մասնակիցները նմանատիպ մրցույթների ժամանակ հաճախ կոմպլեքսավորված են լինում` ելնելով մեր հոգեկերտվածքից, իսկ Մերին այդպիսին չէր»,- ասաց Գրիգոր Կյոկչյանը:
Խոսելով Մերիի` «Նոր Ալիք»-ի բեմում կատարած երգերից, Գրիգորը տեղեկացրեց, որ սկզբում նրանք Մերիի համար բոլորովին այլ երգացանկ էին պատրաստել, սակայն մրցույթի կազմակերպիչների կամքով Մերին մրցութային օրերին կատարել է երկու հայալեզու երգ.
«Մրցույթի առաջին օրը Մերին կատարեց իր համար հատուկ գրված երգ, որի հեղինակները ես և Մարտին Միրզոյանն էինք, իսկ երկրորդ օրը նա կատարեց «Հայաստանը դու ես» հայտնի հիթը: Այսինքն`նրանք ցանկություն չհայտնեցին, որպեսզի Մերին կատարի անգլալեզու երգ: Պետք է նշեմ, որ երկու օրերն էլ Մերին ժյուրիի անդամների կողմից արժանացել է շատ բարձր գնահատականների»,- մանրամասնեց Գրիգորը:
Իսկ ինչ վերաբերում է Մերիի մրցանակին, Գրիգոր Կյոկչյանը տեղեկացրեց, որ որպես մրցանակ` Մերին հնարավորություն ունի մասնակցելու նոյեմբերին Բուլղարիայում կայանալիք «Մանկական Եվրատեսիլ»-ին, սակայն ոչ թե որպես մասնակից, այլ` որպես հյուր:
Անդրադառնալով իր և Մերիի համագործակցությանը` Գրիգորը նշեց, որ իր կարծիքով ամեն ինչ առջևում է, և որ ինքն ու Մերին դեռ կշարունակեն աշխատել և պատրաստվել ավելի լուրջ մրցույթների.
«Սա Մերիի առաջին միջազգային մրցույթն էր, նա ընդահանրապես փորձ չուներ: Եվ ես պետք է Մերիին միայն գովեստի խոսքեր ասեմ, քանի որ նա կարողացավ իսկապես պատվով դուրս գալ ստեղծված իրավիճակից»,- նկատեց Մերի Քոչարյանի պրոդյուսերը:
Զրույցի վերջում էլ անդրադառնալով իր մասնակցությանը հոկտեմբերին Սոչիում կայանալիք «Նոր Ալիք» մրցույթին` Գրիգորն ասաց, որ նա արդեն իսկ պատրաստ է իր ելույթներին և հնարավորինս ամեն ինչ կանի, որպեսզի ինչպես որ հարկն է ներկայանա ժյուրիի անդամների առջև.
«Ես և իմ երաժշտական պրոդյուսերը` Մարտին Միրզոյանը, շատ լավ ենք պատրաստվել: Ամեն ինչ կանեմ, որպեսզի հնարավորինս լավ ելույթ ունենամ: Հատուկ ինձ համար նոր անգլալեզու երգ է գրվել, որի երաժշտության հեղինակը Մարտին Միրզոյանն է, իսկ խոսքերինը` ես եմ: Այն աֆրիկյան մոտիվներով, 6/8 ռիթմով հետաքրքիր երգ է: Բացի սրանից բացառապես այլ տարբերակով կատարելու եմ Boney M.-ի հայտնի «Sunny» ստեղծագործությունը, իսկ մրցութային հաջորդ օրը զուգերգով եմ հանդես գալու ռուսական խմբերից մեկի հետ, որի ընտրությունը իմ ցանկությամբ չի, որ եղել է»,-Asekose.am-ի հետ զրույցում տեղեկացրեց Գրիգորը:
Խոսելով իր մրցակիցների մասին` երգիչն ասաց, որ արդեն հասցրել է ծանոթանալ իր բոլոր մրցակիցների ունակություններին.
«Լսել եմ բոլորին, բոլորն էլ բավական ուժեղ արտիստներ են: Կարող եմ միայն ասել, որ մրցակցություն իսկապես լինելու է, պարզապես ելնելով մրցույթի ձևաչափից, նշեմ, որ, ցավոք, տեղյակ չեմ, թե իմ մրցակիցները ինչ երգերով են հանդես գալու: Ինչպես արդեն գիտենք, այստեղ ամեն ինչ հենց տեղում է որոշվում»,- իր խոսքը եզրափակեց Գրիգոր Կյոկչյանը:
Հեղինակ` Սաթենիկ Խաչատրյան