Արդեն տեղեկացրել ենք այն մասին, որ մարդկանց օգնությամբ հավաքված գումարի արդյունքում օրեր առաջ «Էրեբունի» բժշկական կենտրոնում տեղի է ունեցել ավտովթարի հետևանքով տուժած դերասանուհի Ջուլիա Սաղաթելյանի ողնաշարի բարդ վիրահատությունը: Asekose.am-ը փորձեց կապ հաստատել դերասանուհու հետ՝ ճշտելու նրա ներկայիս առողջական վիճակի, սպասվող հետագա վիրահատության և այլ մանրամասների մասին:
Մեզ հետ զրույցի ընթացքում դերասանուհին թեև դժվարացավ խոսել, բայց, այնուամենայնիվ, ասաց, որ իր վիրահատությունը լավ է անցել, բայց արդեն մի քանի օր է, ինչ ուժգին ցավեր ունի.
«Բժիշկներն ասում են, որ այդ ցավերը բնական են, որ հենց այսպես էլ պետք է լիներ»,- մանրամասնեց դերասանուհին:
Իսկ հարցին՝ արդյոք հետագայում կրկին վիրահատություն սպասվում է, Ջուլիան պատասխանեց, որ դեռ պարզ չէ, քանի որ անհրաժեշտ է նախևառաջ ապաքինվել ողնաշարի վիրահատությունից հետո, նոր հետո մտածել հաջորդի մասին.
«Ոտքս դեռ լավ վիճակում չէ: Հնարավոր է, որ վիրահատություն տեղի ունենա, ինչի շնորհիվ կկարողանամ նորից քայլել, բայց ինքս այս պահի դրությամբ հստակ ոչինչ չգիտեմ»,- պարզաբանեց Ջուլիա Սաղաթելյանը:
Անդրադառնալով վիրահատության համար հավաքված անհրաժեշտ գումարին՝ դերասանուհին նշեց, որ գումարը բավականացրել է միայն իմպլանտ գնելու համար, իսկ հետագա վիրահատության, այնուհետև նաև վերականգնողական պրոցեսների համար անհրաժեշտ գումար դեռևս չկա:
Հիշեցնենք, որ Ջուլիա Սաղաթելյանը հոկտեմբերի 27-ին Երևան-Գյումրի ավտոճանապարհին տեղի ունեցած ավտովթարի հետևանքով վնասել էր 8-րդ ողը և ուներ ոտքի կոտրվածք: Վիրահատության համար անհրաժեշտ էր 6.000 դոլար, սակայն դերասանուհու ընտանիքը չուներ հնարավորություն՝ հոգալու ծախսերը:
Asekose.am-ը ևս առողջություն և շուտափույթ ապաքինում է ցանկանում դերասանուհուն:
Հեղինակ՝ Սաթենիկ Խաչատրյան