Բրիտանացի գիտնականները պարզել են, որ փոքր չափաբաժնով ալկոհոլի գործածումը հղիների վրա նեգատիվ ազդեցություն չի ունենում, չի ազդում երեխայի ոչ ֆիզիկական, ոչ մտավոր զարգացման վրա: Ինչպես գրում է Globalscience.ru-ն, գիտնականները հետազոտել են 10,5 հազար 7 տարեկան երեխաների, որոնց մայրերը հղիության շրջանում կամ թեթևակի խմել են, կամ առհասարակ ալկոհոլ չեն օգտագործել: Երկու խմբերի միջև զգալի տարբերություններ չեն եղել: Ուսումնասիրության հեղինակներից մեկը` Իոան Քելլին ընդգծել է. «Մենք գիտենք, որ հարբեցողությունը հղիության ընթացքում վնասակար է պտղի համար, սակայն քիչ հավանական է, որ փոքր չափաբաժնով ալկոհոլը որևէ բացասական ազդեցություն ունենա: Սակայն մենք դեռևս ուսումնասիրել ենք երեխաների զարգացումը մինչև 7 տարեկան, թե ինչ կարող է լինել դրանից, դեռևս անհայտ է: Լրացուցիչ հետազոտությունների կարիք կա, մինչև որ կկարողանանք լիարժեքորեն պնդել, որ ալկոհոլի փոքր չափաբաժինը միանշանակ անվտանգ է հղիության շրջանում»,- եզրափակել է գիտնականը:
