Այսօր՝ հոկտեմբերի 29-ին, լրանում է Երևանի «Շենգավիթ» բժշկական կենտրոնից հուլիսի 27-ին «Էրեբունի» ԲԿ տեղափոխված և երկու օր անց մահացած 26-ամյա ծննդկան Մերի Մարգարյանի մահվան երեք ամիսը: Թեև անցել է բավական երկար ժամանակ, այնուամենայնիվ, գործը դեռևս բացահայտված չէ, կան շատ հարցեր, որոնք պատասխաններ չունեն:
Asekose.am-ի հետ զրույցի ընթացքում Մարգարյանների իրավհաջորդի շահերի պաշտպան Մարինե Թովմասյանն իր մտահոգությունը հայտնեց, որ հանձնաժողովային փորձաքննության օրը դեռ չի նշանակվել:
«Քննիչը որոշումը կայացրել է մեկ ամիս առաջ և այս ընթացքում առողջապահության նախարարությունն արդեն պետք է հանձնաժողով ստեղծեր, փորձաքննության օրն էլ նշանակեր, վարույթն իրականացնող մարմինը թույլատրել է մեզ մասնակցելու փորձաքննությանը, բայց մինչ օրս որևէ տեղեկություն չկա, թե երբ է տեղի ունենալու այդ փորձաքննությունը, առ այսօր ոչինչ չի արվել»,- Asekose.am-ի հետ զրույցը եզրափակեց Մարգարյանների իրավհաջորդի շահերի պաշտպան Մարինե Թովմասյանը՝ հավելելով, որ այս փաստն իրեն և իր պաշտպանյալներին խիստ մտահոգում է:
Նշենք, որ Մերի Մարգարյանի գործով առողջապահության նախարարությունը ներքին քննություն էր անցկացնում և դրա եզրակացությունն արդեն հանձնել էր քննիչին:
Հիշեցնենք, որ Մերի Մարգարյանի հարազատները կատարվածի մեջ մեղադրում են «Շենգավիթ» բժշկական կենտրոնի բժշկուհի Շուշանիկ Բախշյանին և ողջ բուժանձնակազմին:
Հեղինակ՝ Լիլիթ Նավասարդյան
