«Ղեկավարությունն այսօր ճիշտ քայլ կանի, եթե անկեղծանա ժողովրդի հետ: Գուցե նախագահը ներողություն խնդրելով ու հրաժարական տալով հերոսանա: Ժամանակն է եկել սթավելու: Կգա ժամանակ, որ նմաններին դրսում տեսնելիս մարդիկ կհարձակվեն նրանց վրա: Կարծում եմ, որ հիմա ոչ թե ծրագրերի, այլ ելքեր փնտրելու ժամանակն է: Անթույլատրելի են քաղաքական կուսակցությունների լռությունը, պաշտոնյաների ձևական հայտարարությունները: Տպավորություն է, որ մեկը մյուսից վախենում է»,-լրագրողների հետ հանդիպման ժամանակ ասաց «Իրավաբանների և հոգեբանների միջազգային ասոցիացիա» ՀԿ ղեկավար Խաչատուր Մարոզյանը:
Անդրադառնալով ոստիկանների կողմից քաղաքացիների իրավունքների ոտնահարմանը, Խաչատուր Մարոզյանը նշեց, որ այս առիթով կարելի է դիմել իրավապաշտպան կազմակերպություններին, ոչ կուսակցական հասարակական կազմակերպություններին.
«Ոստիկանության կողմից հասցված նյութական, բարոյական վնասի փոխհատուցման համար պետք է քաղաքացիները դատարան դիմեն, որպեսզի պետությունը մեծ պատասխանատվություն ու ցավ զգա, որ քաղաքացիների նկատմամբ ուժ կիրառելուց, տներն այրելուց առաջ մտածեն»,-նկատեց «Իրավաբանների և հոգեբանների միջազգային ասոցիացիա» ՀԿ ղեկավարը:
Ինչ վերաբերում է քաղաքացիական հագուստով ոստիկաններին, ապա բանախոսի կարծիքով, ցույցի լիդերները պետք է օրենքի պահանջին համապատասխան վարեն այս գործընթացները, որպեսզի այս գաղտնի ծառայողները չկարողանան սադրանքներ անել:
Անի Կարապետյան
