«Այս պահի դրությամբ Երևանի ավագանու նիստին քվորում չկա, նիստը համարվում է չկայացած»,- այս մասին հայտարարեց փոխքաղաքապետ Կամո Արեյանը՝ 30 րոպե առաջ հայտարարված ընդմիջումից վերադառնալուց հետո:
Նշենք, որ մինչ այդ ընդմիջում էր հայտարարվել, քանի որ եթե ավագանու նիստին քվորում չի ապահովվում՝ հայտարարվում է ընդմիջում, իսկ եթե ընդմիջումից հետո էլ ավագանու անդամների թիվը բավարար չի լինում՝ նիստը համարվում է չկայացած։
Հավելենք, որ ըստ օրենքի՝ ներկա պետք է լինեին ավագանու անդամների կեսից ավելին:
Հիշեցնենք, որ ավելի վաղ ավագանիում ներկայացված 3 ուժերից երկուսը՝ ՀՀԿ-ն և «Ելք»-ը, արդեն հայտարարել էին, որ ոչ միայն քաղաքապետի թեկնածու չեն առաջադրելու, այլև չեն մասնակցելու այդ նիստին, ինչը նշանակում է, որ ավագանու նիստը չի կայանալու:
Նշենք, որ Երևանի քաղաքապետի միակ թեկնածուն «Երկիր Ծիրանի» խմբակցության ղեկավար Զարուհի Փոստանջյանն էր:
