Լրագրող Նաիրի Հոխիկյանը գրառում է կատարել իր էջում. «Օրերս Գեղարքունիքի մարզի արևելյան հատվածում էի։ Այստեղ թշնամին որոշ առաջխաղացում ունի՝ սպառնալով սահմանամերձ բնակավայրերին։
Գեղամասար գյուղը մեծ բնակչություն ունեցող համայնքներից մեկն է։ Տեղացիները կամային մարդիկ են, չեն էլ մտածում հեռանալու մասին՝ հիմնականում կանգնելով առաջնագծում ու պաշտպանելով ինչպես սեփական տունը, այնպես էլ երկիրը։
Ազգային գործիչներ, հաճախ մեկնեք սահմանամերձ համայնքներ, շփվեք տեղի բնակիչների հետ՝ լսելով նրանց հոգսերի մասին ու տալով տեղեկություններ իրականության մասին»:

Ստորև նաև ՊՆ այսօրվա հաղորդագրությունը. Վարդենիսի ուղղությամբ հրետանային միջոցների առկայությունը անմիջականորեն կապված է Ադրբեջանի ԶՈՒ կողմից լրացուցիչ ուժերի և միջոցների տեղաշարժով ու բացազատման հետ, որն առաջացրել է որոշակի լարվածություն:

Հայկական կողմի քայլերը, որ իրականացվել են տվյալ գոտում ադրբեջանական հրետանային և զենիթային լրացուցիչ միջոցների տեղակայումից հետո, կրում են բացառապես պաշտպանական բնույթ:

Հայկական կողմի գործողությունները իրադրությունը լարելու նպատակ չունեն, և ադրբեջանական կողմի՝ հիշատակված միջոցները տվյալ ուղղությունից դուրս բերելու դեպքում, հայկական կողմը ևս դուրս կբերի իր լրացուցիչ միջոցները: Հայկական կողմը պատրաստ է տվյալ հարցի շուրջ բանակցել: Այս մասին հայտնում է ՀՀ ՊՆ մամուլի քարտուղարը: