Հոկտեմբերի 27-ի ոճրագործության 25-րդ տարելիցն է․ քաղաքացիներն այցելում են «Եռաբլուր» պանթեոն։ Ազատամարտիկ, Երևանի նախկին քաղաքապետ Ալբերտ Բազեյանը լրագրողների հետ զրույցում ասաց, որ «Հոկտեմբերի 27-ը» մեծագույն ողբերգություն էր մեր նորագության պատմության մեջ, աղետ՝ ժողովրդի և պետության համար։ «Ցավոք, հետագայում տարբեր մախինացիներով ոճրագործությունը լիարժեք չբացահայտվեց։ Համոզված եմ, որ այն նախօրոք կազմակերպված ու պլանավորված հանցագործություն էր․ զենքերը նախօրոք էին տարվել ԱԺ, իսկ զենքերը ԱԺ կարող էին տանել այն մարդիկ, ովքեր իրավունք ունեին մեքենայով մտնել ներս»,- նշեց Բազեյանը։

***

«Արդյո՞ք բացահայտված է Հոկտեմբերի 27-ի ոճրագործությունը»,- «Եռաբլուր»-ում դիմելով ՔՊ-ական պատգամավոր Գագիկ Մելքոնյանին՝ հարցրին լրագրողները։ «Բացահայտված են կատարողները, իսկ կազմակերպիչները՝ դեռ ոչ, որի համար նորից սկսվում է գործընթաց։ Տեղյակ եմ, որ գործընթացն արդեն սկսվել է։ Հուսով ենք՝ կբացահայտվեն»,- ասաց նա։ «Վերջերս հանդիպում ունեցա քննչական մարմինների հետ, իրենք կատարում են աշխատանքներ, մի քանի հարց էլ ինձ են ուղղել, պատասխանել եմ։ Հուսով ենք՝ կբացահայտվի»,- հավելեց պատգամավորը։